ကလေးစစ်သားဘဝ အတွေ့အကြုံများကို မီဒီယာအား ဖြေကြားခဲ့ခြင်းသည် တပ်မတော်၏ဂုဏ်သိက္ခာကို ညှိုးနွမ်းစေသည်ဟုဆိုကာ ရာဇသတ်ကြီးပုဒ်မ ၅၀၅ (ခ) ဖြင့် ထောင်ဒဏ် နှစ်နှစ် ချမှတ်ခံထားရသူ ကိုအောင်ကိုထွေးသည် ယနေ့ မနက် ၈ နာရီ တွင် လွတ်ရက်စေ့၍ အင်းစိန်ထောင်မှ ပြန်လည် လွတ်မြောက်လာသည်။

၎င်းသည် ပုဒ်မ ၅၀၅(ခ) အမှုအတွက် ရင်ဆိုင်နေဆဲမှာပင် တရားသူကြီးအား “နွား” ဟု ခေါ်သည့်အမှု အတွက် ထောင်ခြောက်လ ချခံခဲ့ရသေးသူဖြစ်သည်။ စတင်ဖမ်းဆီးခံရချိန်မှ ပြန်လွတ်လာချိန်အထိ ထောင်ထဲတွင် နှစ်နှစ် နေခဲ့ရသည်။

ထောင်ဘူးဝမှထွက်ထွက်ချင်းတွင် ၂၀၀၈ ဖွဲ့စည်းပုံ အ‌ခြေခံဥပဒေ ဖျက်သိမ်းရန် အမှန်တကယ် လိုအပ်နေကြောင်း အသက် ၂၈ နှစ်အရွယ် ၎င်းက ပြောသည်။

၂၀၀၅ ခုနှစ် အသက် ၁၄ နှစ်အရွယ်တွင် နေပြည်တော်မှအပြန် ရန်ကုန်ဘူတာကြီး၌ ကလေးစစ်သားအဖြစ် စုဆောင်းခံခဲ့ရသည့်အကြောင်းနှင့် အတွေ့အကြုံများကို လွတ်လပ်သော အာရှအသံ (RFA) မြန်မာပိုင်းကို ၂၀၁၇ ဩဂုတ်လ ၁၈ ရက်က ဖြေကြားခဲ့သည့်အတွက် ဒုဗိုလ်မှူးကြီး မျိုးမြင့်အောင်က ဒဂုံဆိပ်ကမ်းမြို့နယ် တရားရုံးတွင် ယင်းလမှာပင် တရားစွဲဆိုခဲ့ခြင်းဖြစ်ပြီး ၂၀၁၈ ခုနှစ်မတ်လ ၂၈ ရက်တွင် ထောင်ဒဏ် နှစ်နှစ် ချမှတ်ခံရသည်။

ပုဒ်မ ၅၀၅ (ခ)အတွက် တရားရင်ဆိုင်ချိန်အတွင်း ဒဂုံဆိပ်ကမ်းမြို့နယ် တရားသူကြီးကို “နွားတရားသူကြီး” ဟု ကို‌အောင်ကိုထွေးက တရားရုံးလျှောက်လမ်းတွင် အော်ဟစ်ပြောဆိုခဲ့ရာ တရားစီရင်မှုဆောင်ရွက်နေသော ပြည်သူ့ဝန်ထမ်းအား တမင်စော်ကားခြင်း၊ သို့တည်းမဟုတ် ဝင်ရောက်နှောင့်ယှက်ခြင်း ပုဒ်မ ၂၂၈ ဖြင့် ၂၀၁၈ ခုနှစ် ဖေဖော်ဝါရီ ၁၄ ရက်၌ ယင်းမြို့နယ်တရားရုံးကပင် အလုပ်မဲ့ ထောင်ဒဏ်ခြောက်လ ချမှတ်ခဲ့ သည်။

ပုဒ်မ ၅၀၅ (ခ) အတွက် ထောင်ဒဏ် နှစ်နှစ် ချမှတ်သည့်နေ့၌ပင် အောင်ကိုထွေးနှင့် ဝန်းရံသူအချို့သည် တရားရင်ဆိုင်နေစဉ် ဖွဲ့စည်းပုံအခြေခံဥပဒေစာအုပ်ကို ခြေဖြင့်နင်း၍ ဆန္ဒပြခဲ့သည်ဆိုကာ အထူးဥပဒေဖြစ်သည့် နိုင်ငံတော်အထိမ်းအမှတ်တံဆိပ်ဥပဒေ ပုဒ်မ ၇ ဖြင့် ထပ်မံတရားစွဲခံရသော်လည်း အောင်ကိုထွေးမှာ အပြစ်မရှိသဖြင့် ယင်းပုဒ်မအတွက် တရားသေလွတ်မြောက်ခဲ့သည်။

၎င်း၏အစ်မဖြစ်သူ မနေဇာထွန်းသည်လည်း ၎င်း၏မောင် ပုဒ်မ၅၀၅ (ခ) ဖြင့် တရားရင်ဆိုင်‌နေရခြင်းအပေါ် မကျေနပ်၍ ရုံးထုတ်ချိန်တွင် တရားရုံးရှေ့၌ ၂၀၀၈ ဖွဲ့စည်းပုံ အခြေခံဥပဒေကို ဆန့်ကျင် ဆန္ဒပြခဲ့ရာ နိုင်ငံတော်အကြည်ညိုပျက်စေမှု ပုဒ်မ ၅၀၅ (ခ)၊ ဆူပူအောင်ဖန်တီးစေမှု ပုဒ်မ ၁၅၃ တို့ဖြင့် ဒဂုံဆိပ်ကမ်းရဲစခန်းမှ တရားစွဲခဲ့ပြီး ယခုအချုပ်ဖြင့် တရားရင်ဆိုင်နေရသည်။

ကိုအောင်ကိုထွေးသည် ကလေးစစ်သားအဖြစ် စုဆောင်းခံရပြီး နှစ်နှစ်ကျော်အကြာ တပ်မှထွက်ပြေးချိန်တွင် အတူပြေးလာသူတစ်ဦးက ဆိုင်ကယ်လုရင်း လူသတ်မိခြင်းကြောင့် ကြံရာပါအဖြစ် ထောင်ဒဏ် တစ်သက်တစ်ကျွန်း ကျခံခဲ့ရသည်။ ထို့နောက် ထောင် ဒဏ် ၁၀ နှစ် ပြောင်းလဲကျခံရ၍ ၂၀၁၇ ဇူလိုင် ၇ ရက်တွင် မန္တလေးအိုးဘိုထောင်မှ ၎င်း အသက် ၂၆ နှစ်အရွယ်၌ လွတ်မြောက်ရာမှ တပ်မတော်တွင်း စုဆောင်းခံထားရမှုမှလည်း လွတ်မြောက်ခဲ့သူ ဖြစ်သည်။

ပုဒ်မ ၅၀၅(ခ) တွင် နိုင်ငံတော်အစိုးရကိုဖြစ်စေ၊ နိုင်ငံတော်ငြိမ်ဝပ်ပိပြားရေးကိုဖြစ်စေ ထိခိုက်သည့်ပြစ်မှုကို တစ်ဦးတစ်ယောက်သောသူက ကျူးလွန်ချင်လာအောင် အများပြည်သူကိုသော် လည်းကောင်း၊ အများပြည်သူ၏ သီးခြားလူစုကိုသော်လည်းကောင်း၊ ကြောက်ခြင်း၊ ထိတ်လန့်ခြင်း တစ်ခုခုဖြစ်စေရန် အကြံရှိလျှင် သို့တည်းမဟုတ် ထိုသို့ဖြစ် ဖြစ်စေတန်ရာသည့် အကြောင်းရှိလျှင် ထိုသူကို နှစ်နှစ်အထိ ထောင်ဒဏ်တစ်မျိုးမျိုးဖြစ်စေ၊ ငွေဒဏ်ဖြစ်စေ၊ ဒဏ်နှစ်ရပ်စလုံးဖြစ်စေ ချမှတ်ရမည်ဟု ပြဋ္ဌာန်းထားသည်။

Leave a Reply