မြန်မာနိုင်ငံတွင် မသင်မနေရ ပညာရေးစနစ်ကို မူလတန်းမှ အလယ်တန်းထိ သတ်မှတ်ထားသော်လည်း ကျောင်းနေအရွယ် ကလေးငယ်များစွာသည် မိသားစုစားဝတ်နေရေး အခက်အခဲများကြောင့် ကျောင်းပြင်ပတွင် ဝမ်းစာအတွက် ကျင်လည်နေရသည်ကို နေ့စဉ်နှင့်အမျှ တွေ့မြင်နေရသည်။ အခြေခံပညာကျောင်းများတွင် မေလ ၂၅ ရက်နေ့၌ ၂၀၁၆-၂၀၁၇ ပညာသင်နှစ်အတွက် စတင်ကျောင်းအပ်နှံကြပြီးဖြစ်သည်။
၁။ ယခုပညာသင်နှစ်တွင် မူလတန်းမှ အထက်တန်းအထိ အခမဲ့ပညာသင်ကြားနိုင်ရန် မည်သည့်အခကြေးငွေမျှ ပေးရန်မလိုကြောင်း ပညာရေးဝန်ကြီးဌာနမှ ထုတ်ပြန်ထားသည်။
၂။ ၂၀၁၅-၂၀၁၆ ပညာသင်နှစ်ကာလက မွန်ပြည်နယ်တွင် ကျောင်းနေအရွယ် ကလေးငယ်ပေါင်း ၄၈၉၂၃၈ ဦး ရှိခဲ့သော်လည်း ကျောင်းအပ်နှံခဲ့သည့် ကလေးဦးရေမှာ ၃၉၄၇၆၉ ဦးသာရှိခဲ့သည်။
၃။ အကြောင်းအမျိုးမျိုးကြောင့် ကျောင်းနေခွင့်မရသော ကလေးငယ်များသည် ကျောင်းပြင်ပတွင် ဝမ်းရေးအတွက် လုပ်ငန်းအမျိုးမျိုးတွင် ရုန်းကန်ရှာဖွေနေကြရသည်။
၄။ အလုပ်အကိုင် အခွင့်အလမ်းရှားပါးခြင်းသည် သာမန်မိသားစုဘဝများကို ဆင်းရဲတွင်းသို့ တွန်းပို့နေပြီး ကျောင်းနေအရွယ် ကလေးငယ်များကို ဘဝကြမ်းများထဲသို့ ခေါ်ဆောင်သွားတော့သည်။
၅။ ကျောင်းနေခွင့်မရသော ကလေးငယ်ပေါင်းများစွာကို ကျောင်းဝင်းအတွင်းသို့ ပြန်လည်ရောက်ရှိအောင် စွမ်းဆောင်နိုင်ခြင်းက ၎င်းတို့မိသားစုစီးပွားရေး အဆင်ပြေခြင်းသာ အဓိကကျနေပြီးလော။
