Advertisements

Myanmar Now

တတိယအကြိမ်ပြုလုပ်ပြီးနောက် တစ်နှစ်ကျော်ကြာမကျင်းပနိုင်သေးသည့် ၂၁ ရာစုပင်လုံ၊ ပြည်ထောင်စု ငြိမ်းချမ်းရေးညီလာခံအစည်းအဝေးများ မည်သို့ရှေ့ဆက်မည်ကို ပါဝင်သည့် အင်အားစုများအားလုံးအကြား ဘုံလုပ်ငန်းစဉ်ချမှတ်နိုင်ရေးကို အစိုးရ၏ ရှေ့ဆက်လျှောက်လှမ်းမည့် ငြိမ်းချမ်းရေးလုပ်ငန်းစဉ် သုံးရပ်အနက် ပထမလုပ်ငန်းစဉ်အဖြစ်ချမှတ်ထားကြောင်း ဒေါ်အောင်ဆန်းစုကြည်က ပြောသည်။

နှစ်ပတ်ခန့်နောက်ကျ၍ အောက်တိုဘာ ၂၈ရက်မှ ပြုလုပ်ကျင်းပခဲ့ရသော တစ်နိုင်ငံလုံးပစ်ခတ်တိုက်ခိုက်မှု ရပ်စဲရေးသဘောတူစာချုပ်(NCA) လေးနှစ်မြောက်နှစ်ပတ်လည်အခမ်းအနား မိန့်ခွန်းတွင် ထိုသို့ထည့်သွင်း အသိ ပေးခြင်းဖြစ်သည်။

ယင်းလုပ်ငန်းစဉ်သည် NCA စာချုပ်လက်မှတ်ထိုးပြီးသော တိုင်းရင်းသားခေါင်းဆောင်ကြီးများ စတင်အဆိုပြု ခြင်းဖြစ်ပြီး ကြိမ်ဖန်များစွာဆွေးနွေးခဲ့သည်ဟု ၎င်းကဆက်ပြောသည်။

ယခုအခါ အဆိုပါ လုပ်ငန်းစဉ်ကို အကောင်အထည်ဖော်ရန် အစုအဖွဲ့အသီးသီးအကြား မူအားဖြင့် သဘောတူနိုင်ခဲ့သည်များလည်းရှိကြောင်း နိုင်ငံတော်အတိုင်ပင်ခံပုဂ္ဂိုလ် ကအသိပေးသည်။

ရှေ့ဆက်မည့် ငြိမ်းချမ်းရေးလုပ်ငန်းစဉ်သုံးရပ်အနက် ပထမဆုံးဖြစ်သည့် အထက်ပါ လုပ်ငန်းစဉ်ကို NCA စာချုပ်အကောင်အထည်ဖော်မှုဆိုင်ရာ မူဘောင်သဘောတူညီချက်များရရှိရေး၊ ၂၁ ရာစု ပင်လုံအစည်းအဝေးတွင် ဖက်ဒရယ်ဆိုင်ရာ အခြေခံမူများထပ်မံရရှိရေး၊ လာမည့် ၂၀၂၀ ပြည့်နှစ် အထွေထွေရွေးကောက်ပွဲအလွန်တွင် ဆက်လက်ဖော်ဆောင်မည့် အဆင့်အလိုက် လုပ်ငန်းစဉ်များ၊ ဦးစားပေးလုပ်ငန်းစဉ်များဆိုင်ရာ ဘုံသဘောတူညီချက်ရရှိရေး နည်းလမ်းများဖြင့် အကောင်အထည်ဖော်ရန် စီစဉ်ထားခြင်းဖြစ်သည်။

ယင်းနောက် အဆိုပါကိစ္စ သဘောတူညီချက်ရရှိပါက လာမည့် ၂၁ ရာစုပင်လုံ စတုတ္တမြောက်ညီလာခံ၌ ပြည်ထောင်စုသဘောတူစာချုပ်များအဖြစ်ချုပ်ဆိုနိုင်ရန် မျှော်မှန်းထားကြောင်း ဒေါ်အောင်ဆန်းစုကြည်၏ မိန့်ခွန်းတွင်ပါဝင်သည်။

အစိုးရ၏ ရှေ့ဆက်လျှောက်လှမ်းမည့် ဒုတိယမြောက် ငြိမ်းချမ်းရေးလုပ်ငန်းစဉ်မှာ ပါဝင်သင့် ပါဝင်ထိုက်သူ အားလုံးပါဝင်ရေးဖြစ်ပြီး NCA စာချုပ်တွင်လက်မှတ်မရေးထိုးရသေးသည့် တိုင်းရင်းသားလက်နက်ကိုင်အဖွဲ့များ ပါဝင်လာနိုင်ရေး ဆက်လက်ကြိုးပမ်းအားထုတ်ရန်ဖြစ်သည်။

ငြိမ်းချမ်းရေးအသီးအပွင့်များကို ပြည်သူလူထုရရှိခံစားနိုင်ရေးကို တတိယမြောက်လုပ်ငန်းစဉ်အဖြစ် အစိုးရက သတ်မှတ်ထားကြောင်း ဒေါ်အောင်ဆန်းစုကြည်က ပြောသည်။

ထို့ကြောင့် နှစ်ပေါင်း ၇၀ ကျော်ကြာကြုံတွေ့နေရ သည့် အခြေအနေများကို ပြောင်းလဲပစ်နိုင်ရန် စိတ်တူကိုယ်တူပူးပေါင်း ဆောင်ရွက်လျှင်မဖြစ်နိုင်စရာမရှိဟု ၎င်းက တိုက်တွန်းခဲ့သေးသည်။

“ကျွန်မတို့အစိုးရနဲ့ ပူးပေါင်းလက်တွဲပြီး ဆောင်ရွက်ပေးကြဖို့အလေးအနက် မေတ္တာရပ်ခံတိုက်တွန်းလိုပါတယ်” ဟု ဒေါ်ဆောင်ဆန်းစုကြည်ကပြောသည်။

ယနေ့ကျင်းပသည့် အခမ်းအနားတွင် မိန့်ခွန်းပြောသူနောက်တစ်ဦးဖြစ်သည့် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်ကလည်း တပ်မတော်သည် NCA လုပ်ငန်းစဉ်များအတိုင်း ခိုင်ခိုင်မာမာ ဆက်လက် လုပ်ဆောင်သွားမည်ဟု ဆိုသည်။

သို့သော် ငြိမ်းချမ်းရေးနှင့် နိုင်ငံရေးကိုခွဲခြားရှုမြင်ပါမှ လက်တွေ့အလုပ်ဖြစ်နိုင်မည်ဟုယုံကြည်ကြောင်း ၎င်းက ဆိုသည်။

ထို့အတူ အစိုးရ၏ ၂၁ ရာစုပင်လုံနှင့် ဗိုလ်ချုပ်အောင်ဆန်းခေတ် ပင်လုံတို့၏ အနှစ်သာ ရကွာခြားမှုကို သတိပြုရန်လိုကြောင်းကိုလည်း တပ်ချုပ်က မိန့်ခွန်းတွင်ထည့်ပြောခဲ့သေးသည်။

ယခင်ပင်လုံသည် မြန်မာနိုင်ငံလွတ်လပ်ရေးရရန် နိုင်ငံရေးကို ဦးတည်ဆွေးနွေးခဲ့ခြင်ဖြစ်ပြီး ယနေ့ခေတ် ၂၁ ရာစု ပင်လုံသည် ပြည်တွင်းလက်နက်ကိုင် ပဋိပက္ခ ရပ်တန့်နိုင်ရန် ငြိမ်းချမ်းရေးကို ဦးတည်နေခြင်းဖြစ်ကြောင်း ၎င်းက ရည်ညွှန်းခြင်းဖြစ်သည်။

သို့သော် ငြိမ်းချမ်းရေးနှင့်နိုင်ငံရေး မည်သည့်အတွက်ခွဲခြားရှုမြင်သင့်ကြောင်းကိုမူ ဗိုလ်ချုပ်မှူးကြီးမင်းအောင်လှိုင်က ရှင်းလင်းစွာထည့်သွင်းပြောကြားခဲ့ခြင်းမရှိပေ။

NCA ထိုးထားပြီးအဖွဲ့ဖြစ်သည့် ပအိုဝ်းအမျိုးသားလွတ်မြောက်ရေးအဖွဲ့ချုပ် နာယက ခွန်ဥက္ကာ ကမူ “ငြိမ်းချမ်းရေးလုပ်ငန်းနဲ့ နိုင်ငံရေးလုပ်ငန်းကို ခွဲပြောတယ်ဆိုပေမယ့် တိုင်းပြည်ဖွံ့ဖြိုးတိုးတက်ဖို့၊ တိုင်းပြည်မှာ ရှိနေတဲ့ နိုင်ငံရေးစနစ်အပြောင်းအလဲဖြစ်ဖို့ကတော့ ငြိမ်းချမ်းရေးက အခြေခံပါ။ ဒီအခြေခံပေါ်မှာမှ နိုင်ငံရေးစနစ် ကို ပြောင်းလဲနိုင်မှာပါ”ဟု Myanmar Now ကိုမှတ်ချက်ပြုသည်။

ထို့အတူ အစိုးရကြေညာသည့် ငြိမ်းချမ်းရေး လုပ်ငန်းစဉ် သုံးရပ်အနက် ပထမလုပ်ငန်းစဉ်မှာ ၎င်းတို့နှင့် အခြေခံအားဖြင့် ဆွေးနွေးသဘောတူညီထားပြီး ဖြစ်ကြောင်း ခွန်ဥက္ကာ ကအတည်ပြုသည်။

နေပြည်တော်ရှိ အပြည်ပြည်ဆိုင်ရာကွန်ဗန်းရှင်းစင်တာ (၂)တွင် ယနေ့ပြုလုပ်သည့် NCA အခမ်းအနားသို့ အပစ်ရပ်တိုင်းရင်းသားလက်နက်ကိုင် ၁၀ ဖွဲ့အနက် ၉ ဖွဲ့မှ ထိပ်သီး ခေါင်းဆောင်များတက်ရောက်သည်။

ရခိုင်အမျိုးသားလွတ်မြောက်ရေးပါတီ (ALP)၊ ကရင်အမျိုးသားအစည်းအရုံး (KNU)၊ ဒီမိုကရေစီအကျိုးပြု ကရင်အမျိုးသားတပ်မတော် (DKBA)၊ ကရင် ငြိမ်းချမ်းရေးကောင်စီ (KPC)၊ ပအိုဝ့်အမျိုသားလွတ်မြောက်ရေး အဖွဲ့ချုပ် (PNLO)၊ ချင်းအမျိုးသားတပ်ဦး (CNF)၊ မြန်မာနိုင်ငံလုံးဆိုင်ရာကျောင်းသားများ ဒီမိုကရက်တစ်တပ်ဦး (ABSDF)၊ မွန်ပြည်သစ် (NMSP)၊ လားဟူဒီမိုကရက်တစ် အစည်းအရုံး (LDU) တို့ဖြစ်သည်။

ရှမ်းပြည်ပြန်လည်ထူထောင်ရေးကောင်စီ (RCSS) ခေါင်းဆောင်များမှာမူ ထိုင်းနိုင်ငံဘက်မှ နေပြည်တော်သို့ လာရောက်ရန် တပ်မတော်နှင့် လမ်းကြောင်းညှိနှိုင်းမှုအဆင်မပြေဖြစ်ခဲ့၍ တက်ရောက်လာခြင်းမရှိပေ။

RCSS ခေါင်းဆောင် ဗိုလ်ချုပ်ကြီးရွက်ဆစ်ရောက်မလာခြင်းကြောင့် NCA စာချုပ်ဖြင့် ဖော်ဆောင်နေသည့် ငြိမ်းချမ်းရေး လုပ်ငန်းစဉ်အတွင်း အခြေခံအကျဆုံးဖြစ်ပြီး တစ်နှစ်ကျော်ကြာ တရားဝင်ကျင်းပနိုင်ခြင်းမရှိသည့် တစ်နိုင်ငံလုံး ပစ်ခတ်ရပ်စဲရေးပူးတွဲအကောင်အထည်ဖော်မှုဆိုင်ရာ ညှိနှိုင်းအစည်းအဝေး (JICM) ပြန်လည်စတင်မည့်ရက်ကို ထိပ်သီး ခေါင်းဆောင်များအကြား အပြီးသတ်ညှိနှိုင်းရရှိခြင်းမရှိသေးပေ။

ယနေ့ ညီလာခံတွင် မိန့်ခွန်းပြောခွင့်ရသည့် တိုင်းရင်းသားလက်နက်ကိုင်အစုအဖွဲ့ဖက်မှ တစ်ဦးတည်းသော ပုဂ္ဂိုလ် ကရင်အမျိုးသားအစည်းအရုံး ဥက္ကဌ ဗိုလ်ချုပ်ကြီး စောမူတူးစေးဖိုးကလည်းRCSS အဖွဲ့မလာရောက်နိုင်၍ လွန်စွာဝမ်းနည်းစိတ်မကောင်းဖြစ်ရကြောင်း ထည့်သွင်းပြောဆိုခဲ့သည်။

ထို့ပြင် လက်ရှိအခြေအနေမှာ ယုံကြည်မှု အားနည်းနေပြီး အာဃာတတရားများ အားကောင်းနေကြောင်း၊ ပြန်လည်ဆန်းစစ်ရန်လိုကြောင်း ၎င်း၏ မိန့်ခွန်းတွင်ထည့်သွင်းထောက်ပြသည်။

“ကျွန်တော်တို့တွေဟာ ဘာကို မယုံမကြည်ဖြစ်နေကြရတာလဲ” ဟု လည်း ဗိုလ်ချုပ်ကြီး စောမူတူးစေးဖိုးက မေးခွန်းထုတ်ခဲ့သည်။

Advertisements
<

Leave a Reply