Advertisements

ဉာဏ်လှိုင်လင်း

၂၀၀၈ ဖွဲ့စည်းပုံပြင်ဆင်ရေးအတွက် ပြည်ထောင်စုလွှတ်တော်က ဖွဲ့စည်းထားသည့် ၄၅ ဦးပါ ပူးပေါင်းကော်မတီက နိုင်ငံရေးပါတီများအကြံပြုထားသည့် အချက်ပေါင်း ၃၇၆၆ ချက်ပါရှိသော ဖွဲ့စည်းပုံပြင်ဆင်ရေး အစီရင်ခံစာကို လွှတ်တော်တွင် တင်သွင်းအတည်ပြုထားပြီး ဥပဒေကြမ်းရေးဆွဲရန် ပြင်ဆင်လျက်ရှိသည်။ သို့သော် ယမန်နေ့က ပူးပေါင်းကော်မတီ အဖွဲ့ဝင်တစ်ဦးဖြစ်သည့် မအူပင်မြို့နယ်ပြည်သူ့လွှတ်တော်အမတ် ဦးစိန်ဝင်းသည် ကော်မတီမှနုတ်ထွက်ကြောင်း ရုတ်တရက်ကြေညာခဲ့သည်။ သူက ကော်မတီအတွင်း ကွဲလွဲမှုများအပေါ် မဲခွဲပါက လျှို့ဝှက်မဲစနစ်မသုံးဘဲ လက်ညှိုးထောင်ခိုင်းခြင်းကြောင့် မျှတမှုမရှိဟုဆိုကာ နုတ်ထွက်သွားခဲ့ခြင်းဖြစ်သည်။

ဦးစိန်ဝင်းသည် ၂၀၁၂ ကြားဖြတ်ရေးကောက်ပွဲ နှင့် ၂၀၁၅ အထွေထွေ ရွေးကောက်ပွဲများတွင် လက်ရှိအာဏာရ အမျိုးသားဒီမိုကရေစီအဖွဲ့ချုပ်(NLD) ကိုယ်စားပြု ဝင်ရောက်ယှဉ်ပြိုင်ခဲ့သူဖြစ်ပြီး လွန်ခဲ့သည့်နှစ်နှစ်က NLD နှင့်လမ်းခွဲခဲ့ကာ အမျိုးသားညီညွတ်သောဒီမိုကရက်တစ်ပါတီကို ထူထောင်ခဲ့သူဖြစ်သည်။ ပူးပေါင်းကော်မတီမှ နုတ်ထွက်ရသည့်အကြောင်းအရင်း နှင့် ၂၀၀၈ ဖွဲ့စည်းပုံပြင်ဆင်ရေး ဆွေးနွေးပွဲများအတွင်း သဘောထားကွဲလွဲနေမှုများကို Myanmar Now သတင်းထောက် ဉာဏ်လှိုင်လင်းက  ဦးစိန်ဝင်းကို နေပြည်တော်တွင် စက်တင်ဘာ ၂ ရက်က ဆက်သွယ်မေးမြန်းထားပါသည်။

Myanmar Now – ပူးပေါင်းကော်မတီကနေ ဘာကြောင့် နုတ်ထွက်တာလဲ။

Advertisements
data-language="en"

ဦးစိန်ဝင်း – ဒီကနေ့ နုတ်ထွက်စာတင်ရတဲ့ အဓိကအကြောင်းကတော့ သုံးချက်ပါ။ ဥပဒေမူကြမ်းပေါင်းချုပ်ကနေ အားလုံးသဘောတူတဲ့ ဥပဒေမူကြမ်းတစ်ခုရဖို့ ဩဂုတ်လ ၂၉ ရက်မှာ ဆွေးနွေးအတည်ပြုတော့ လက်ညှိုးထောင်ပြီးမဲပေးတဲ့စနစ်ကို မလုပ်ပါနဲ့။ လျှို့ဝှက်မဲပေးတဲ့စနစ်ကို လုပ်ပါ။ ဒါမှ ပူးပေါင်းကော်မတီဝင် ၄၅ ဦးစလုံးက ဘယ်သူ့မျက်နှာမှမကြည့်ဘဲနဲ့ တိုင်းပြည်အတွက် အကောင်းဆုံးလုပ်ပေးနိုင်မယ့် အနေအထားရှိပါတယ်၊ အဲဒီလို တင်ပြတယ်။ ဖန်တီးပေးဖို့ နှစ်ကြိမ်တိတိ တောင်းဆိုတယ်။ အခြားတိုင်းရင်းသားပါတီက နှစ်ဦး သုံးဦးက ထောက်ခံတယ်။ သို့သော် အကြောင်းအမျိုးမျိုးပြပြီး ငြင်းပယ်ခံရတယ်။ အဲဒီတစ်ချက်ကို ဘဝင်မကျဘူး။

နောက်တစ်ချက်က ပူးပေါင်းကော်မတီဖွဲ့စဉ်က အမိန့်စာမှာ ဦးတည်ချက် ငါးရပ်နဲ့ ဆောင်ရွက်ဖို့ပါတယ်။ ဒီမိုကရေစီစံချိန်စံညွှန်းနဲ့ ကိုက်ညီဖို့၊ ရှေ့နောက်ဥပဒေတွေနဲ့ ညီညွတ်ဖို့၊ ဒီမိုကရေစီဖက်ဒရယ်ပြည်ထောင်စုစနစ် တည်ဆောက်ဖို့၊ အစရှိသဖြင့်ပါတယ်။ ဒါကြောင့် လျှို့ဝှက်မဲစနစ်နဲ့မလုပ်ရင် ဦးတည်ချက် ငါးရပ်ကို အပြည့်အဝ အကောင်အထည်ဖော်နိုင်မှာမဟုတ်ဘူး။

နောက်တစ်ခုကတော့ လက်ညှိုးထောင်သဘောထားယူတဲ့စနစ်က ဥပဒေကြမ်းစရေးတဲ့ ဩဂုတ် ၂၉ ရက် ပူးပေါင်းကော်မတီ အစည်းအဝေးပြီးတဲ့အခါမှာ ဘာဖြစ်လဲဆိုတော့ ပါတီကြီးတစ်ခု (ကော်မတီအတွင်း လူအများစုဖြစ်သည့် အာဏာရအမျိုးသားဒီမိုကရေစီအဖွဲ့ချုပ်) က အဆိုပြုထားတဲ့ဟာတွေ အားလုံးပဲ အနိုင်ရ တာ တွေ့ရတယ်။ ပါတီငယ်လေးတွေဖြစ်တဲ့ တိုင်းရင်းသားတွေတင်တဲ့အဆိုအပါအဝင် တခြားအဆို ဘာတစ်ခုမှ အောင်မြင်တာမရှိဘူး။ ဒီလိုသာ ဆက်သွားမယ်ဆိုရင် ဒီဖွဲ့စည်းပုံပြင်ဆင်ရေးဟာ ပါတီတစ်ခုရဲ့ စိတ်ကြိုက်ရေးဆွဲတာမျိုးပဲ ဖြစ်လာနိုင်တော့မယ်။ တိုင်းရင်းသားတွေနဲ့ မျက်နှာပျက်ရမယ်။ ဒါကြောင့် အနိုင်ကျင့်တယ်လို့ ယူဆတဲ့အတွက်၊ အနိုင်ကျင့်တဲ့ပုံစံကိုလည်း မကြည့်ချင်တော့တဲ့အတွက် နုတ်ထွက်တာပါ။ ဒီဖြစ်ပေါ်လာနိုင်တဲ့ ဖွဲ့စည်းပုံပြင်ဆင်ချက်တွေရဲ့ အမှား၊ အားနည်းချက်တွေက ကျွန်တော့်အတွက် သမိုင်းတရားခံ အဖြစ်မခံနိုင်ပါဘူး။

Myanmar Now – မဲပေးတဲ့စနစ်ပြောင်းပေးပါလို့ အန်ကယ်တောင်းဆိုတော့ ပူးပေါင်းကော်မတီတာဝန်ရှိသူတွေက ဘာပြန်ပြောလဲ။

ဦးစိန်ဝင်း – သူတို့ပြောတာက ပူးပေါင်းကော်မတီဟာ ပါတီအလိုက်ရွေးချယ်ထားတာဖြစ်တယ်။ ပါတီရဲ့လမ်းညွှန်ချက်နဲ့ ပါတီဝင်တွေက ဆောင်ရွက်ရတာဖြစ်တဲ့အတွက် လက်ညှိုးထောင်တဲ့စနစ်ကိုပဲ သွားမယ်။ ဒါပါတီရဲ့မူဝါဒအတိုင်း အကောင်အထည်ဖော်ရမှာဖြစ်တယ်လို့ ရှင်းလင်းတယ်လေ။ တော်တော်ဝမ်းနည်းစရာ ကောင်းတယ်။

Myanmar Now – ပါတီဆိုတာက အမျိုးသားဒီမိုကရေစီအဖွဲ့ချုပ် (NLD) ကို ရည်ညွှန်းတာလား။

ဦးစိန်ဝင်း – ဒါပေါ့။ ဒါပေါ့။

Myanmar Now – ပူးပေါင်းကော်မတီအတွင်းမှာ မဲပေးတဲ့စနစ်ကို အန်ကယ့်အပြင် တခြားကန့်ကွက်သူတွေရော ရှိပါသေးလား။

ဦးစိန်ဝင်း – ရှိတယ်။ အဲဒီလိုမလုပ်ဖို့ တိုင်းရင်းသားတွေထဲက နှစ်ဦး၊ သုံးဦး ထပြောတယ်။ ဒါပေမဲ့ သူတို့(ပူးပေါင်းကော်မတီ တာဝန်ရှိသူ) က ခုနပြောတဲ့စကားလိုပဲ ပြန်ပြောတယ်။

Myanmar Now – လက်ညှိုးထောင်မဲပေးမယ်ဆိုရင် ပူးပေါင်းကော်မတီထဲမှာ အများစုဖြစ်တဲ့ NLD ပါတီက လူတွေဆီက ကွဲပြားခြားနားတဲ့ ဆုံးဖြတ်ချက်တွေ မရနိုင်ဘူး။ လျှို့ဝှက်မဲပေးစနစ်ဆိုရင် NLD ပါတီဝင်တွေ ကိုယ်တိုင်က လွတ်လပ်စွာ ဆန္ဒပြုခွင့်ရမယ်။ အဲဒါကို ဆိုလိုချင်တာလား။ နုတ်ထွက်ဖို့ အကြောင်းတစ်ရပ်လို့ အန်ကယ် ပြောခဲ့တဲ့ မဲပေးစနစ်အပေါ် သဘောထားကို တိတိကျကျ သိချင်တာပါ။

ဦးစိန်ဝင်း – ဟုတ်တာပေါ့။ သူတို့သဘောဆန္ဒအပြင် အမှန်တရားကို ပိုမိုရွေးချယ်နိုင်ဖို့ သူတို့မှာ အခွင့်အရေး ရသွားတာပေါ့။

Myanmar Now – ဩဂုတ် ၂၉ ရက် ပူးပေါင်းကော်မတီအစည်းအဝေးမှာ ဘာတွေများ ဆွေးနွေးဆုံးဖြတ်ခဲ့ကြပါသလဲ။

ဦးစိန်ဝင်း – အခန်း ၁ (နိုင်ငံတော်အခြေခံမူများ) ပြီးသွားပြီ။

Myanmar Now​​​​​​​ ဒီကနေ့ ထပ်လုပ်တဲ့ ပူးပေါင်းကော်မတီအစည်းအဝေးကို အန်ကယ်မတက်တော့ဘူးပေါ့။ နုတ်ထွက်စာ တင်တော့ရော ကော်မတီတာဝန်ရှိသူတွေက ဘာပြောလဲ။

ဦးစိန်ဝင်း – ဟုတ်တယ်။ ဒီနေ့ကစပြီးမတက်တော့ဘူး။ နုတ်ထွက်တဲ့အပေါ်မှာတော့ ကော်မတီတာဝန်ရှိသူတွေက ဘာမှမပြောသေးပါဘူး။

Myanmar Now​​​​​​​ – တိုင်းရင်းသားတွေနဲ့ မျက်နှာပျက်ရမယ့် အခြေခံဥပဒေပြင်ဆင်ရေးဖြစ်လာမယ်လို့လည်း အန်အယ်ပြောခဲ့တော့ ဥပဒေကြမ်းအတွက် ပထမဆုံးအကြိမ် ပူးပေါင်းကော်မတီအစည်းအဝေး၊ ဖွဲ့စည်းပုံပါ အခန်း (၁) ဆွေးနွေးဆုံးဖြတ်ချက်တွေအပေါ် ဘယ်လိုဘဝင်မကျစရာမျိုးတွေ တွေ့ရပါသလဲ။ ဖက်ဒရယ်ပြည်ထောင်စုစနစ် တည်ဆောက်ဖို့ဆိုတဲ့ ရည်မှန်းချက်မှာ ဘယ်အချက်တွေက စိုးရိမ်စရာရှိခဲ့လို့ပါလဲ။

ဦးစိန်ဝင်း – ဥပမာ။ ဒီမိုကရေစီဖက်ဒရယ်ပြည်ထောင်စုစနစ်ကို သွားမယ်ဆိုရင် အခန်း (၁) ထဲက ပုဒ်မတစ်ခုဖြစ်တဲ့ ‘တပ်မတော်သည် အမျိုးသားနိုင်ငံရေးကို ဦးဆောင်တဲ့အခန်းကဏ္ဍက အစဉ်တစ်စိုက် ဆောင်ရွက်မည်’ ဆိုတဲ့ ပြဋ္ဌာန်းချက်မျိုးပေါ့။ ကျွန်တော်အပါအဝင် တိုင်းရင်းသားပါတီတွေက ကိုယ်စားလှယ်တွေက ပယ်ဖျက်ချင်တယ်လေ။ NLD ပါတီကြီးကကျတော့ တပ်မတော်ဟာ နိုင်ငံရေးထဲမှာ ပါဝင်ခွင့်ရှိတယ်ဆိုတာမျိုး ရေးထားတယ်။ အဲဒီတော့ ဖက်ဒရယ်ပြည်ထောင်စုစနစ်ကို သွားမယ်ဆိုပြီး နဂိုဦးတည်ချက်အတိုင်းဖြစ်အောင် လုပ်တာမျိုး မဟုတ်ဘူးလေ။

Myanmar Now​​​​​​​ – ဥပဒေကြမ်းရေးနေတဲ့ ပူးပေါင်းကော်မတီအစည်းအဝေးတွေမှာ အခြေခံဥပဒေပြင်ဆင်တဲ့အခါ ၂၅ ရာခိုင်နှုန်းသော မဲပေးခွင့်ကို ရယူထားတဲ့ တပ်မတော်ရဲ့ ပါဝင်ဆောင်ရွက်မှု အခြေအနေကရော ဘယ်လိုရှိပါသလဲ။

ဦးစိန်ဝင်း – တပ်မတော်ကတော့ စောင့်ကြည့်နေတယ်။ ဘာမှကို ထူးထူးခြားခြား ဆောင်ရွက်တာမရှိဘူး။ မဲလည်းမပေးဘူး။ ကြားနေတယ်။ နားထောင်ရုံနဲ့၊ အပေါ်ကြောလေးတွေ ထိန်းပေးရုံ၊ အကြံပြုရုံပဲ လုပ်တယ်။ ပါဝင်ဆွေးနွေးမှု တက်တက်ကြွကြွ မလုပ်ဘူး။ စောင့်ကြည့်နေတဲ့သဘော။ ဘယ်သူက ဘယ်လိုလဲဆိုတာကို လေ့လာဆန်းစစ်၊ ခွဲခြမ်းစိတ်ဖြာနေတဲ့ သဘောမျိုးပေါ့။

Myanmar Now​​​​​​​ – အတိုက်အခံ ပြည်ထောင်စုကြံ့ခိုင်ရေးနဲ႔ဖွံ့ဖြိုးရေးပါတီ ကိုယ်စားလှယ်တွေကရော။

ဦးစိန်ဝင်း – သူတို့လည်း အဲဒီအတိုင်းပဲ။

Myanmar Now​​​​​​​ – တိုင်းရင်းသားပါတီတွေရဲ့ ပါဝင်ဆောင်ရွက်မှုအခြေအနေကရော ခင်ဗျ။

ဦးစိန်ဝင်း – တိုင်းရင်းသားတွေကတော့ အကုန်လုံးခံနေရတော့တာပေါ့။ ပူးပေါင်းကော်မတီထဲမှာ တိုင်းရင်းသားအားလုံးပေါင်းမှ ၁၄ ဦးပဲပါတယ်။ ၁၄ မဲပဲ ရှိတယ်ပေါ့။ ပြီးတော့ မွန်က တစ်မျိုး ပြင်ချင်တယ်၊ ရခိုင်က တစ်မျိုး ပြင်ချင်တယ်၊ ရှမ်းက တစ်မျိုး ပြင်ချင်တယ်ဆိုတော့ဗျာ။ ကျွန်တော်က တိုင်းရင်းသားတွေကို မကြည့်ရက်တော့လို့ပါ။ တော်ပြီ၊ အချိန်ကုန်ပြီး ဘာမှ အကျိုးရှိမှာမဟုတ်ဘူး။ ကျွန်တော် ပါပါမပါပါ ပါတီကြီး (NLD)ရဲ့ ဆောင်ရွက်ချက်အတိုင်းပဲ ဖြစ်သွားမှာပဲ၊ ပါလည်း အကြောင်းမထူးတော့ဘူးလို့ ဆုံးဖြတ်လိုက်တာ။

Myanmar Now​​​​​​​ – ဘယ်လိုပဲဖြစ်ဖြစ် အခြေခံဥပဒေပြင်ဆင်ရေး ဥပဒေကြမ်းတစ်ခုကတော့ ပြည်ထောင်စုလွှတ်တော်မှာ မဲခွဲဖို့ တက်လာနိုင်တာပေါ့နော်။ ဒါဆို လက်ရှိအခြေခံဥပဒေပြင်ဆင်နိုင်ရေး အလားအလာကို ဘယ်လို သုံးသပ်နိုင်ပါသလဲ။

ဦးစိန်ဝင်း – ဥပဒေကြမ်းကတော့ ပြည်ထောင်စုလွှတ်တော်ကို ရောက်လာမှာပဲ။ သို့သော် အခြေခံဥပဒေပြင်ဖို့ ပူးပေါင်းကော်မတီဖွဲ့ခဲ့တဲ့ ရည်မှန်းချက်နဲ့ တိုင်းတာရင်တော့ အားနည်းမှုတွေရှိမှာပေါ့။ တိုင်းရင်းသားတွေဖြစ်ချင်တဲ့ ဖက်ဒရယ်ပြည်ထောင်စုစနစ်နဲ့သက်ဆိုင်တဲ့ ကိစ္စမျိုးတွေမှာပေါ့။ ဒါက ဖြစ်လာနိုင်တဲ့ အနေအထားပေါ့။

ဒါပေမဲ့ တချို့ သုံးသပ်သလိုပေါ့။ လက်ရှိအခြေခံဥပဒေ အခန်း (၁၂) (ဖွဲ့စည်းပုံအခြေခံဥပဒေပြင်ဆင်ခြင်း) အတိုင်းဆိုရင် ဘယ်လိုမှဖြစ်မလာနိုင်ဘူးလို့ ပြောကြတာပေါ့လေ။ တစ်ဖက်မှာလည်း အခန်း (၁၂) အတိုင်းလုပ်ပါလို့ အကြပ်ကိုင်နေတဲ့ သူတွေလည်း ရှိနေတယ်လေ။ ဒါဆိုရင်တော့ ဘယ်လိုမှ ပြင်မရဘူး။ ဒါပေမဲ့ ကျွန်တော့်အမြင်ကတော့ NLD က အခန်း (၁၂) ကို ကျော်လွှားနိုင်ခြေရှိလို့ အခြေခံဥပဒေပြင်ဖို့ လုပ်တာပေါ့။ ဘယ်လိုကျော်မလဲ၊ ဘယ်လိုနည်းလမ်းနဲ့လဲတော့ ကျွန်တော် တိတိကျကျ မပြောနိုင်ဘူးပေါ့။

(ပြဋ္ဌာန်းချက်တစ်ခုပြင်ဆင်နိုင်ရန် ပြည်ထောင်စုလွှတ်တော်၌ ၇၅ ရာခိုင်နှုန်းကျော်သော ထောက်ခံမဲလိုအပ်ဟု လက်ရှိအခြေခံဥပဒေက သတ်မှတ်ထားသည်။)

Myanmar Now​​​​​​​ – ဒါဆိုရင် အာဏာရပါတီ NLD ကြွေးကြော်ထားတဲ့ အခြေခံဥပဒေပြင်ဆင်ရေးဆိုတာ ရာနှုန်းပြည့် မဟုတ်ရင်တောင် တစ်နည်းနည်းနဲ့ ဖြစ်လာနိုင်တယ်လို့ အန်ကယ် သုံးသပ်ထားတာလား။

ဦးစိန်ဝင်း – အဲဒါကတော့ တပ်မတော်က အခုလိုကြားနေမယ်၊ ပြည်ထောင်စုလွှတ်တော်နဲ့ လိုက်လျောညီထွေစွာ ပူးပေါင်းဆောင်ရွက်တယ်ဆိုရင်တော့ စံချိန်၊ စံညွှန်းမမီတောင်မှ တပ်မတော်သဘောကျနိုင်တဲ့ အချက်တွေပါတဲ့ ဖွဲ့စည်းပုံအသစ်တစ်ခုတော့ ရလာနိုင်တာပေါ့။

Myanmar Now​​​​​​​ – အခု NLD ဦးဆောင်ပြီး  ပူးပေါင်းကော်မတီကတစ်ဆင့် ရေးဆွဲနေတဲ့ ခြေဥပြင်ရေး ဥပဒေမူကြမ်းမှာ တပ်မတော်သဘောတူညီနိုင်မယ့် အချက်တွေကတော့ ပြင်သွားနိုင်မယ့်အလားအလာ ရှိတယ်လို့ ဆိုလိုတာလား။ ပထမ အန်ကယ်ပြောခဲ့သလိုပေါ့၊ နိုင်ငံရေးနဲ့ တပ်မတော်အခန်းကဏ္ဍအပေါ် စကားသုံးကိုပဲ ပြင်ဖို့ အတည်ပြုလိုက်တာမျိုးပေါ့။

ဦးစိန်ဝင်း – ဟုတ်တယ်။ ခုနပြောသလိုပဲ။ တိုင်းရင်းသားတွေက နိုင်ငံရေးကနေ တပ်မတော်ကို လုံးဝဖယ်စေချင်တာ။ ဒီပြဋ္ဌာန်းချက်ကို ပယ်ဖျက်ချင်တာလေ။ NLD ဦးဆောင်တဲ့ ပူးပေါင်းကော်မတီက မဖယ်ရှားပစ်လိုက်ဘူးလေ။ ဒါလည်း ကျွန်တော်ကတော့ အပြစ်မတင်ပါဘူး။ လက်ရှိအခြေအနေအရ တပ်မတော်နဲ့ အပေးအယူလုပ်ပြီး သွားချင်လည်းသွားပေါ့။ NLD က အင်အားကြီးပါတီလေ။ ဒါပေမယ့် တိုင်းရင်းသားဆန္ဒတော့ တချို့တလေလေးတွေ ပါလာဖို့လိုတယ်လေ။ ဒါပေမဲ့ ပူးပေါင်းကော်မတီထဲမှာ ဒီပုံစံအတိုင်း လက်ညှိုးထောင်မဲပေးတဲ့စနစ်ကို ဆက်သုံးရင် တိုင်းရင်းသားတွေက ဘာတစ်ခုမှကို ပြင်နိုင်မှာမဟုတ်ဘူး။

Myanmar Now​​​​​​​ – ဒါဆိုရင် NLD က တပ်မတော်သဘောတူနိုင်မယ့် ဟာတွေကိုပဲ ပြင်ဖို့ ဦးတည်နေတယ်လို့ ဆိုလိုတာလား။

ဦးစိန်ဝင်း – အဲဒီလိုသုံးသပ်လို့ရပါတယ်။ ထင်ရတာပေါ့။ အခုကတော့ အခန်း (၁) နဲ့ ပတ်သက်တာပဲလုပ်ရသေးတာ ဆိုတော့လေ။ နောက် ကျန်တဲ့အခန်းတွေကို စောင့်ကြည့်ရင် ပိုပြီး ထင်ထင်ရှားရှား သိနိုင်မှာပေါ့။

Myanmar Now​​​​​​​ – အန်ကယ်က NLD ပါတီကနေ အမတ်ဖြစ်လာသူ၊ အခုတော့ ပါတီက နုတ်ထွက်ထားခဲ့ပြီပေါ့။  ဆိုတော့ အခုလို ပူးပေါင်းကော်မတီကနေ ထပ်ထွက်တာဟာ NLDကို အကြပ်အတည်းဖြစ်အောင်လုပ်တာ သက်သက်လို့ ဝေဖန်မှုအချို့ကိုလည်း ကြားနေရပါတယ်။ ဘာပြောချင်လဲ။

ဦးစိန်ဝင်း – ကျွန်တော်သည် ပြည်သူနဲ့ နိုင်ငံတော်အတွက် အမှန်တရားအတွက် အလုပ်လုပ်နေတာပါ။ အမှန်တရားအပေါ်အခြေခံပြီးတော့ အခုနုတ်ထွက်တာပါ။ ဦးတည်ချက်ကို ပြောထားပြီး အဲဒီအတိုင်းပဲ လုပ်ချင်ပါတယ်။ မလုပ်နိုင်ရင် မလုပ်နဲ့။ အပြည့်အဝအကောင်အထည်ဖော်နိုင်တာကိုပဲ လုပ်ချင်တာပါ။ ဦးတည်ချက်ကတစ်မျိုး လုပ်တော့ တစ်မျိုးတော့ ကျွန်တော် မလုပ်တတ်လို့ပါ။ အဲဒီတော့ ပူးပေါင်းကော်မတီအစည်းအဝေးတွေမှာ ကျွန်တော်က ငြိမ်ငြိမ်ထိုင်နေမှာမှမဟုတ်တာ။ ပြောမှာကိုး။ ဒါဆိုရင် NLD အတွက် အဟန့်အတားတွေ ဖြစ်လာနိုင်တာကြောင့်လည်း ပါပါတယ်။ အဲဒါကြောင့် သူတို့သွားတဲ့လှေကို ကိုယ်မစီးချင်လို့ အသာလေးထွက်လိုက်တယ်။ သူတို့ဆက်သွားပါစေဆိုပြီးတော့ပါ။ NLD ကထွက်ပြီး အမျိုးသားညီညွတ်သောဒီမိုကရက်တစ်ပါတီကို ထောင်တဲ့အခါမှာလည်း နောက်မှာ လက်မည်းလည်းမရှိပါဘူး။ လက်နီလည်းမရှိပါဘူး။ စိုက်ပျိုးရေးပညာရှင် တစ်ယောက်အနေနဲ့ ဆင်းရဲနေတဲ့ တောင်သူလယ်သမားတွေရဲ့ ဘဝကို ကူညီနိုင်ဖို့ ရှိစုမဲ့စုလေးနဲ့ ထူထောင်ထားတာပါ။ အခက်အခဲအများကြီးရှိပါတယ်။ ††

Leave a Reply