၂၀၂၀ မေ ၅

(ရန်ကုန် )

မြန်မာနိုင်ငံတွင် COVID-19 ရောဂါ ဓာတ်ခွဲအတည်ပြု လူနာဟောင်းများအနက် နှစ်ကြိမ်ဆက်တိုက် ပိုး မတွေ့ရှိသူ စုစုပေါင်း ၄၉ ဦးရှိပြီ ဖြစ်ကြောင်း ကျန်းမာရေးနှင့် အားကစားဝန်ကြီးဌာန မေ ၅ ရက် ည ၈ နာရီ ထုတ်ပြန်ချက်အရ သိရသည်။

အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) နှင့် ဆေးသုတေသနဦးစီးဌာနတို့ ယင်းနေ့က ဓာတ်ခွဲနမူနာ ၂၀၀ ကို စစ်ဆေးခဲ့ရာ ရောဂါပိုး မတွေ့ရှိကြောင်း ဖော်ပြထားသည်။

မြန်မာနိုင်ငံတွင် ရောဂါပိုး ကူးစက်ခံခဲ့ရသူမှာ ၁၆၁ ဦးရှိပြီဖြစ်ပြီး ယင်းမှာ ဓာတ်ခွဲစစ်ဆေးခဲ့သူပေါင်း ၉၀၃၇ ဦးမှ စစ်ဆေးတွေ့ရှိချက်အဖြေလည်း ဖြစ်သည်။

ဓာတ်ခွဲအတည်ပြုလူနာများအနက် သေဆုံးသူမှာ ၆ ဦး ရှိခဲ့သည်။

မြန်မာနိုင်ငံ မေ ၄ ရက်ညပိုင်းအခြေအနေမှာ
တိုင်းဒေသကြီး၊ ပြည်နယ်အသီးသီးတွင် သတ်မှတ်နေရာများ၌ အသွားအလာကန့်သတ် စောင့်ကြပ်ကြည့်ရှုသည့် နေရာ ၈၄၈၆ နေရာ ရှိနေပြီး ကန့်သတ် စောင့်ကြည့်ထားသူ ဦးရေ ၄၆၀၀၀ ကျော် ရှိကြောင်း သိရသည်။

Coronavirus Disease 2019 (COVID-19) ကာကွယ်၊ ထိန်းချုပ်၊ ကုသရေးအမျိုးသားအဆင့် ဗဟိုကော်မတီဥက္ကဋ္ဌ၊ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က “Covid ကို ထိမ်းချုပ်ရေးမှာ လောလောဆယ် အထူး အလေးထား ရမဲ့ ကိစ္စကြီး(၂)ရပ်ရှိပါတယ်။ ကျန်းမာရေးအရ စစ်ဆေးပြီး ပြန်ဖွင့်ခွင့် ပေးလိုက်တဲ့ စက်ရုံ၊ အလုပ်ရုံတွေက အလုပ်သမားတွေကြား ရောဂါ
မပြန့်ပွါးရေးနဲ့ နယ်စပ်မှပြန်လာမဲ့ အလုပ်သမားတွေအကြား ရောဂါ မပြန့်ပွါးရေးတို့ဖြစ်ပါတယ်”ဟု သူမ၏ လူမှုကွန်ရက်စာမျက်နှာ ဖေ့စ်ဘုတ်ခ်တွင် မေ ၄ ရက် ညနေပိုင်းက ရေးသားဖော်ပြထားသည်။

Written by ဘသွင်

ဟင်္သာမီဒီယာ

<><><>

Photo Credit : COVID-19 INFO Myanmar Viber Chatbot

Leave a Reply