မော်လမြိုင်၊ မေ ၁၀

Digital ခေတ်တွင် မွန်စာပေဖွံ့ဖြိုးတိုးတက်လာစေရန်အတွက် မွန်တိုင်းရင်းသားလူမျိုးများအားလုံး မွန်ယူနီကုဒ်ကို ပြောင်းလဲ အသုံးပြုရမည်ဖြစ်ကြောင်း တတိယအကြိမ်မြောက်ကျင်းပသည့် Share Arena တွင် မွန်အရှင်အနန္တက မိန့်ကြားသည်။

ယင်းကိစ္စနှင့် ပတ်သက်၍ မွန်လူမှုအဖွဲ့အစည်းအားလုံး မွန်ယူနီကုဒ်ကို ပထမဦးစွာ ပြောင်းလဲအသုံးပြုရ မည်ဖြစ်ပြီး မွန်အမျိုးသား ပညာရေးဋ္ဌာနများ၊ မွန်နှင့်သက်ဆိုင်သည့် ရုံးများအားလုံး ပထမဦးစွာ စတင်ပြောင်းလဲအသုံးပြုသင့်ကြောင်း ဆရာတော် ဆက်လက်မိန့်ကြားသည်။

“စာလုံးတွေက ကြိုက်တဲ့ လက်ကွက် ကြိုက်တဲ့ ဖောင့်နဲ့ သုံးလို့ရတယ်။ စာရွက်နဲ့လည်း Print ထုတ်ပြီး ဖတ်လို့ရတယ်။ ဒါပေမယ့် အနာဂတ်ကို မျှော်ကိုးကြည့်ရင်တော့ ကိုယ့်လူမျိုးရဲ့စာပေအတွက် အများကြီး ဆုတ်ယုတ်သွားလိမ့်မယ်”ဟု ဆရာတော်က မိန့်သည်။

ယင်းကိစ္စနှင့်ပတ်သက်၍ Share Arena ဟောပြောပွဲကို တက်ရောက်လာသော မွန်လူငယ်တစ်ဦးက မွန်လူမျိုးများ ဖွင့်ထားသည့်ကွန်ပျုတာဆိုင်များ၊ မွန်ရုံးများ စတင်ပြောင်းလဲပေး မည်ဆိုပါက မွန်ယူနီကုဒ်ဖောင့်ကို ပြောင်းလဲအသုံးပြုရန်အတွက် ခက်ခဲလိမ့်မည်မဟုတ်ကြောင်း မင်းတလမွန်က ဆိုသည်။

“ဆရာတော်ရှင်းပြသလိုဆိုရင်တော့ ဒီလာမယ့်အနာဂတ်မှာ သူများလူမျိုးတွေပြောင်းလဲသလို ကိုယ့်လူမျိုးမှာ မပြောင်းလဲဘူးဆိုရင် သေချာတာတစ်ခုက နောက်ကျကျန်ခဲ့လိမ့်မယ်”ဟု ၎င်းက ပြောသည်။

မွန်ယူနီကုဒ်ဖောင့်ကို ပြောင်းလဲအသုံးပြုခြင်းအားဖြင့် Google တွင် အချက်အလက်ရှာဖွေခြင်းများကို လွယ်ကူစေမည်ဖြစ်သည်။

တတိယအကြိမ်မြောက် Share Arena ဟောပြောပွဲကို ရှေ့ဟောင်းအမွေနှစ်နှင့် အနုသုခုမပညာကို ဖန်တီးခြင်း၊ ခေတ်မှီမွန်စာပေကိုအသုံးပြုနည်းများ၊ Google Local Guide နည်းပညာများကို ဟောပြောခဲ့ကြောင်း သိရသည်။
Digital ခေတ်တွင် IT ကဏ္ဍတစ်ခုကို မွန်လူမျိုးများအတွက် ဗဟုသုတရရှိစေရန်နှင့် စွမ်းရည်များမြင့်လာစေရန်အတွက် စီစဉ်ဆောင်ရွက်ခဲ့ကြသည်။

တတိယအကြိမ်မြောက် Share Arena ဟောပြောပွဲကို တက်ရောက်သူ ၇၀ ကျော်ရှိကြောင်း မှတ်တမ်းအရ သိရသည်။

Written by အောင်မြတ်

Leave a Reply