Advertisements

အမျိုးသားဒီမိုကရေစီအဖွဲ့ချုပ် ပါတီဝင် အမျိုးသားလွှတ်တော်ကိုယ်စားလှယ် ဦးဝှေ့တင်းကို လုံခြုံရေးအရ စစ်ဆေးစရာများရှိသေးသည့်အတွက် ဆက်လက်ထိန်းသိမ်းထားခြင်းဖြစ်ကြောင်း AA အဖွဲ့၏ ပြောခွင့်ရ ခိုင်သုခက Myanmar Now ကို ပြောသည်။

အမျိုးသားလွှတ်တော်ကိုယ်စားလှယ် ဦးဝှေ့တင်းမှာ စစ်တပ်နှင့် ပူးပေါင်းပြီး AA ၏ သတင်းအချက်အလက်များကို စုဆောင်းရန်အတွက် ခူမီးလူငယ်များကို လျှို့ဝှက်ဖွဲ့စည်းထားကြောင်း ပလက်ဝတွင် နေအိမ်တစ်လုံးငှား ရုံးခန်းဖွင့်ကာ ယင်းလုပ်ငန်းများ လုပ်ဆောင်နေကြောင်း ခိုင်သုခက ဆက်လက်ပြောဆိုသည်။

ယင်းအပြင် ပလက်ဝမြို့နယ်တွင် နေထိုင်သည့် ခူမီးလူမျိုးများနှင့် ရခိုင်လူမျိုးများအကြား ဘာသာရေး၊ လူမျိုးရေးပဋိပက္ခ ဖြစ်ပွားစေရန် သွေးထိုးလှုံ့ဆော်မှုများရှိကြောင်း AA အဖွဲ့ တင်းကြပ်စွာ ပိတ်ပင်ထားသည့် ဘာသာရေး၊ လူမျိုးရေးပဋိပက္ခ ဖြစ်စေနိုင်လောက်သည့် သွေးထိုးလှုံ့ဆော်သူ မည်သူ့ကိုမဆို စုံစမ်း၊ စစ်ဆေးမှုများ မဖြစ်မနေ လုပ်ဆောင်သွားရမည်ဖြစ်ပြီး ဦးဝှေ့တင်းကိုလည်း နှိပ်စက်ညှင်းပန်းမှုမရှိဘဲ လူ့ဂုဏ်သိက္ခာနှင့်အညီ ထိန်းသိမ်းထားကြောင်း ၎င်းက ပြောသည်။

“သူနဲ့ပတ်သက်ပြီးတော့ ကျွန်တော်တို့ဘက်ကနေပြီးတော့ မကြာခင်မှာ ရှင်းလင်းချက်၊ ထုတ်ပြန်ချက်တစ်စောင် ထုတ်ဖို့ရှိတယ်ဗျ။ အဲဒီအချိန်ကျရင်တော့ အားလုံး ရှင်းရှင်းလင်းလင်း သိရပါလိမ့်မယ်” ဟု ခိုင်သုခက ပြောသည်။

ချင်းပြည်နယ် မဲဆန္ဒနယ်အမှတ်(၁၁) ၏ အမျိုးသားလွှတ်တော်အမတ် ဦးဝှေ့တင်းသည်နေပြည်တော်တွင် ယနေ့ပြန်စမည့် လွှတ်တော်အစည်းအဝေးတက်ရန် ရေလမ်းကြောင်းဖြင့်ချင်းပြည်နယ်၊ ပလက်ဝမှ ရခိုင်ပြည်နယ်၊ ကျောက်တော်သို့အသွား ပွေ့ကုန်းအမည်ရှိနေရာတွင် ပျောက်ဆုံးနေခြင်းဖြစ်သည်။

သူနှင့်အတူ နိုင်ငံခြားသား ငါးဦး ၊ စကားပြန် နှင့် ယာဉ်မောင်းများအပါအဝင် စုစုပေါင်း ၁၀ဦး ပျောက်ဆုံးနေခြင်းဖြစ်ပြီး ယနေ့နံနက်တွင် လွှတ်တော်အမတ်မှလွဲ၍ ကျန် ၉ ဦး ပြန်လွတ်လာပြီး နိုင်ငံခြားသားတစ်ဦးမှာမူ သေဆုံးသွားသဖြင့် ပြန်လွှတ်ပေးလိုက်သူများနှင့်အတူ အလောင်းကို ထည့်ပေးလိုက်သည်။

AA တပ်ဖွဲ့၏ ယနေ့ထုတ်ပြန်ချက်တွင် နိုဝင်ဘာလ ၃ ရက်နေ့ နံနက် ၁၀ နာရီခန့်က ကုလားတန်မြစ်အတွင်း သွားလာနေသည့် အမြန်ရေယာဉ် နှစ်စီးကို တားဆီးစစ်ဆေးခဲ့ကြောင်း၊ စက်လှေပေါ်တွင် ပါလာသော ၎င်းတို့ ၁၀ ဦးကို စစ်ဆေးနေစဉ်အတွင်း အိန္ဒိယနိုင်ငံသား တစ်ဦးမှာ အသက်ရှူမွန်းကြပ်ကာ ရုတ်တရက်အမောဖောက် သေဆုံးသွားကြောင်း ဖော်ပြထားသည်။

ယနေ့နံနက်တွင် လွှတ်တော်အမတ်မှလွဲ၍ ကျန်သူများကို လွှတ်ပေးလိုက်ပြီး လွှတ်တော်အမတ် ဦးဝှေ့တင်းကို ခေါ်ယူထိန်းသိမ်းထားရသည့် အကြောင်းအရင်းကိုလည်း မကြာခင် သီးသန့်ထုတ်ပြန်ပေးသွားမည်ဖြစ်ကြောင်း ယင်းထုတ်ပြန်ချက်တွင် ဆက်လက်ဖော်ပြထားသည်။

“လွှတ်တော်ကိုယ်စားလှယ်ဟာ ပြည်သူ့ကိုယ်စား ဆောင်ရွက်တဲ့သူတစ်ဦး ဖြစ်တဲ့အတွက်ကြောင့် တစ်ဦးနဲ့တစ်ဦး ရင်ထဲမှာရှိတဲ့ အာဃာတတွေကြောင့် ဖမ်းဆီးတယ်ဆိုတာ မဖြစ်သင့်ဘူးလို့ ကျွန်မထင်ပါတယ်” ဟု ချင်းပြည်နယ် အမျိုးသားလွှတ်တော်အမတ် ဒေါ်ကျိန်ငိုက်မန်က ပြောဆိုသည်။

အမျိုးသားလွှတ်တော်ကိုယ်စားလှယ် ဦးဝှေ့တင်းမှာ ပလက်ဝမြို့နယ် ခူမီးစာပေနှင့်ယဉ်ကျေးမှုကော်မတီ တွဲဖက်အတွင်းရေးမှူး၊ ပလက်ဝမြို့နယ် ခူမီးလူငယ်များအသင်းအတွင်းရေးမှူး၊ ခူမီးရေးရာပေါင်းစပ် ညှိနှိုင်းရေးကောင်စီ၏ လူငယ်အဖွဲ့ဝင်အဖြစ် တာဝန်ထမ်းဆောင်ခဲ့ကြောင်း အမျိုးသားလွှတ်တော် ဝက်ဘ်ဆိုဒ်တွင် ဖော်ပြထားသည်။

ဖမ်းဆီးခံခဲ့ရသည့် အိန္ဒိယနိုင်ငံသားများမှာ ကုလားတန်မြစ် ဘက်စုံဖွံ့ဖြိုးရေး စီမံကိန်း၏ အစိတ်အပိုင်းတစ်ခုဖြစ်သော ချင်းပြည်နယ်၊ ပလက်ဝမြို့မှ အိန္ဒိယနိုင်ငံ၊ မီဇိုရမ်ပြည်နယ်၊ ဇိုရင်ပူမြို့သို့ ဖောက်လုပ်မည့် ၁၀၉ ကီလိုမီတာ ရှည်မည့် လမ်းစီမံကိန်းကို လုပ်ကိုင်ခွင့်ရထားသည့် C&C JV ကုမ္ပဏီ၏ ဝန်ထမ်းများဖြစ်သည်။

AA တပ်ဖွဲ့မှာ တပ်မတော်၏ စစ်ဆင်ရေးများကို အထောက်အကူပြုနေသည်ဟု သံသယရှိသူများကို ဖမ်းဆီးစစ်ဆေးခြင်းများ မကြာခဏ လုပ်ဆောင်နေပြီး အောက်တိုဘာလ ၂၆ ရက်နေ့မနက်ကလည်း စစ်တွေမြို့မှ ဘူးသီးတောင်မြို့သို့ ထွက်ခွာလာသည့် ရွှေနဒီအမြန်ရေယာဉ်ကို ရသေ့တောင်မြို့နယ် ရေမျက်ကျေးရွာအနီးတွင် AA အဖွဲ့ဝင်များက တားဆီးကာ တပ်မတော်သား ၁၄ ဦး၊ ရဲတပ်ဖွဲ့ဝင် ၂၉ ဦး၊ အကျဉ်းဦးစီးဌာနဝန်ထမ်း ၂ ဦးနှင့် အရပ်သား ၁၃ ဦး စုစုပေါင်း ၅၈ ဦးကို ဖမ်းဆီးခဲ့သည်။

ထို့နောက် ဖမ်းဆီးထားသူများကို AA က စက်လှေသုံးစီးဖြင့် တခြားနေရာသို့ ရွှေ့ပြောင်းနေစဉ် တပ်မတော်က ရဟတ်ယာဉ်များနှင့် လိုက်လံတိုက်ခိုက်ခဲ့သည့်အတွက် စက်လှေနှစ်စီး နစ်မြုပ်သွားပြီး AA တပ်ဖွဲ့ဝင်များရော ဖမ်းဆီးခံထားရသူများပါ အများအပြားသေဆုံးသွားသည်ဟု AA က ထုတ်ပြန်ခဲ့သေးသည်။ တပ်မတော်ကမူ အဆိုပါ ဖမ်းဆီးခံထားရသူများထဲမှ ၁၄ ဦးကို ပြန်လည်ကယ်တင်နိုင်ပြီဟု အောက်တိုဘာ ၂၇ ရက်နေ့က ထုတ်ပြန်ခဲ့သည်။

ရခိုင်ပြည်နယ်တွင် ကုန်းလမ်း၊ ရေလမ်း သယ်ယူပို့ဆောင်ရေး လုပ်ဆောင်နေသူများမှာ AA တပ်ဖွဲ့ထံ သတင်းပို့ကြရန်လည်း AAက ထုတ်ပြန်ချက်များ ထုတ်ပြန်ထားသည်။

အနောက်ပိုင်းတိုင်းစစ်ဌာနချုပ်မှ တိုင်းဦးစီး ဗိုလ်မှူးကြီးဝင်းဇော်ဦးက AA တပ်ဖွဲ့က ဖမ်းဆီးထားသူများကို ကယ်တင်နိုင်ရန် တပ်မတော်က နယ်မြေရှင်းလင်းကယ်ဆယ်ရေးလုပ်ငန်းများ ဆက်လုပ်နေကြောင်း Myanmar Now ကို ပြောသည်။

Advertisements
<

Leave a Reply