Advertisements

ဟိုးလေးတကျော်ဖြစ်နေခဲ့သည့် ဗစ်တိုးရီးယားအမှုတွင် ကလေးငယ်၏ဖခင်က အမှုအတွက် အရေးပါသည်ဟု ယူဆထားသည့် ‘သက်မဲ့သက်သေ’ တစ်ခုကို ရှာဖွေလျှက်ရှိသည်။

ထိုအရာက အခင်းဖြစ်ပွားသည့်နေ့က ကလေးငယ်ရှိနေခဲ့သည့် Wisdom Hill မူကြို ကျောင်းဆောင်ကို ရိုက်ကူးထားသည့် လုံခြုံရေးကင်မရာမှတ်တမ်းများထဲမှ ပျောက်ဆုံးနေသည့် ရုပ်သံမှတ်တမ်း အစိတ်အပိုင်းများဖြစ်သည်။

နေပြည်တော် သပြေကုန်း Wisdom Hill မှ အသက် သုံးနှစ်ပင် မပြည့်သေးသော မူကြိုကျောင်းသူသည် မေလအတွင်းက လိင်ပိုင်းဆိုင်ရာ အမြတ်ထုတ်ခံခဲ့ရပြီးနောက် သူ၏ဖခင်က နေပြည်တော်၊ ဒက္ခိဏခရိုင်တရားရုံးတွင် သူ၏သမီးအတွက် တရားမျှတမှုရရှိရေး အမှုရင်ဆိုင်နေခြင်းဖြစ်သည်။

Advertisements
data-language="en"

ကလေးငယ်၏အခွင့်အရေးကို ကာကွယ်သည့်အနေဖြင့် အမည်ရင်းကို ဖုံးကွယ်ပြီး ‘ဗစ်တိုးရီးယား’ ဟု အများစုက ခေါ်ကြပြီး အလားတူ ဖခင်ဖြစ်သူ၏အမည်ရင်းကိုလည်း သတင်းမီဒီယာများက မဖော်ပြဘဲ “ဗစ်တိုးရီးယား၏ဖခင်” ဟုသာ ရည်ညွှန်းကြသည်။

ရှာဖွေနေသော ရုပ်သံမှတ်တမ်းများ

ဗစ်တိုးရီးယားအမှုတွင် ရဲတပ်ဖွဲ့နှင့် ကျောင်းဖက်မှ တရားရုံးသို့ သက်သေခံတင်သွင်းထားသည့် အခင်းဖြစ်ပွားသော မေ ၁၆ နံနက်(၈)နာရီ မှ ညနေ(၅)နာရီအထိ CCTV ရုပ်သံမှတ်တမ်းများတွင် (၁၁)မိနစ်၊ (၈)မိနစ် နှင့် (၅)မိနစ်စာ အပိုင်းသုံးပိုင်း ပြတ်တောက်နေသည်ဟု ဗစ်တိုးရီးယား၏ဖခင်က ဆိုသည်။

ပြတ်တောက်နေသည့် အစိတ်အပိုင်းများမှာ –

၁) ၁၂: ၄၉: ၄၅ – ၀၁:၀၀:၀၀ (၁၁ မိနစ်ခန့်)
(၂) ၁၃:၅၆:၃၄ – ၁၄:၀၄:၁၄ (၈ မိနစ်ခန့်)
(၃) ၁၆:၀၂:၁၂ – ၁၆:၀၇:၅၇ (၅ မိနစ်ခန့်) တို့ဟုလည်း ကလေးငယ်၏ဖခင်က ဆိုသည်။
ထို့အတူ မူကြိုကျောင်းမှ ကိုရန်နောင်ဌေးဆိုသူ တရားရုံးသို့ နိုဝင်ဘာ ၆ရက်တွင် လာရောက်ပေးအပ်သည့် CCTV မှတ်တမ်းများ သိမ်းဆည်းသည့် စက်ဟုဆိုသော DVR (Hard Diskအပါ­အဝင်) တွင်လည်း မည်သည့်ဖိုင်မျှ ရှိမနေခဲ့။

ထိုနေ့က တရားလိုဘက်မှ အသင့်ခေါ်ယူထားသည့် အိုင်တီနည်းပညာရှင် ကိုမိုး၏ အကူအညီဖြင့် တရားခွင်အတွင်း စစ်ဆေးရာတွင်လည်း စက်အတွင်း မှတ်တမ်းဖိုင်များမရှိသလို Hard Disk နှစ်လုံး ထည့်သွင်းအသုံးပြုနိုင်သည့် DVRစက်အတွင်း တစ်လုံးသာရှိကြောင်းလည်း စစ်ဆေးပေါ်ပေါက်ခဲ့သည်။

“ကျွန်တော့်အနေဖြင့် ပြင်တာဖျက်တာမျိုး မရှိခဲ့ပါ” ဟု နှစ်ဖက်ရှေ့နေများက တရားခွင်အတွင်း မေးမြန်းသည့်အခါတွင်လည်း ကိုရန်နောင်ဌေးက ထွက်ဆိုသည်။

တရားလိုရှေ့နေ ဒေါ်ရွက်နုအောင်ကမူ “အိုင်တီပညာရှင်တွေကတော့ အဲဒါက တမင် ဝင်မဖျက်ရင် မပျက်ဘူးလို့ ပြောတယ်” ဟု မှတ်ချက်ပြုသည်။

အရေးကြီးသည့် CCTV

ဗစ်တိုးရီးယားအမှုတွင် CCTV ရုပ်သံမှတ်တမ်းများက အရေးပါသည့် နေရာတွင် ရှိနေခဲ့သည်။

ကလေးငယ်အား လိင်မတော်မတရား ပြုကျင့်သည်ဟု စွပ်စွဲခံရပြီး ဖမ်းဆီးခံထားရသည့် ကိုအောင်ကျော်မျိုး(ခ) အောင်ကြီးသည် CCTV ရုပ်သံမှတ်တမ်းများအရ ထိုနေ့က ကျောင်းအတွင်း ဝင်ထွက်ခဲ့သည့် တစ်ဦးတည်းသော အမျိုးသားအဖြစ် ရဲက တွေ့ရှိခဲ့ပြီးနောက် ဖမ်းဆီးခဲ့ခြင်းဖြစ်သည်။

သို့သော် ရက်ပိုင်းအတွင်း ယင်းCCTV ရုပ်သံမှတ်တမ်းအချို့ကို BBC သတင်းဌာနက ရရှိသွားခဲ့ပြီး သံသယမှုဖြင့် ဖမ်းခံထားရသော ကိုအောင်ကြီးသည် ကျောင်းအတွင်းရှိ လူမြင်ကွင်းတွင်သာ ထိုင်နေခဲ့သည့် ရုပ်ပုံကို ထုတ်လွှင့်ခဲ့ပြီးနောက်ပိုင်း ပိုမိုပွဲဆူသွားခဲ့သည်။

CCTV က မည်မျှအရေးကြီးကြောင်း နောက်ထပ်နမူနာတစ်ခုကိုလည်း ဗစ်တိုးရီးယား၏ဖခင်က Myanmar Now ကို ဥပမာတစ်ခုပေးကာ ရှင်းပြခဲ့သည်။

အောက်တိုဘာ ၂၂ တရားခွင်စစ်ဆေးချက်များအတွင်း ဗစ်တိုးရီးယား၏ မူကြိုဆရာမတစ်ဦးဖြစ်သူ ဒေါ်နီလာအေးက အခင်းဖြစ်ပွားရာနေ့တွင် စာသင်ဆောင်အတွင်း၌သာ ရှိနေပြီး ကလေးများ၏ အိပ်ယာခင်းအချို့သာ ကျောင်းဆောင်အပြင်သို့ ထွက်၍ လှမ်းခဲ့ကြောင်း ဆိုထားသည်။

သို့သော် တရားရုံးသို့ အပြတ်အတောက်များဖြင့် သက်သေခံအဖြစ် ရောက်ရှိနေသည့် CCTV မှတ်တမ်းများ၌ပင် လမ်းတစ်ဖက်ရှိ အခြားအဆောင်တစ်ခုသို့ ဒေါ်နီလာအေးသည် နေ့လည် ၁၂ နာရီကျော်ချိန်တွင် ထွက်ခွာသွားခဲ့ပြီး (၇) မိနစ်ခန့်ကြာမှ ကျောင်းဆောင်ဆီသို့ ပြန်ရောက်လာသည်ကို တွေ့ရကြောင်း ဗစ်တိုးရီးယား၏ဖခင်အပါအဝင် နှစ်ဖက်ရှေ့နေများက ထောက်ပြခဲ့သည်။

အဆိုပါ အချိန်မတိုင်မီကပင် ဗစ်တိုးရီးယား၏ မူကြိုဆရာမများဖြစ်သော ဒေါ်နှင်းနုနှင့် အခြားဆရာမတစ်ဦးတို့ ပြင်ပသို့ ထွက်ခွာသွားသည်ကို တွေ့ရ၍ ဆရာမများ မရှိသည့်အချိန်နှင့် အခြားအချိန်များတွင် ကျောင်းတွင်းဝင်ထွက်သူများ ရှိမရှိဆိုသည်ကို သက်သေပြရန် အကောင်းဆုံးက CCTV မှတ်တမ်းဟုလည်း ဗစ်တိုးရီးယား၏ဖခင်က ဆိုသည်။

ပြတ်တောက်နေသည့် အစိတ်အပိုင်းများသည် မူရင်း CCTV မှတ်တမ်းများကို သိမ်းဆည်းခဲ့သည့် ရဲတပ်ဖွဲ့နှင့် အမှုကို စစ်ဆေးခဲ့သည့် မှုခင်းအထူးတပ်ဖွဲ့ (စီအိုင်ဒီ)တို့လက်ထဲတွင် ရှိမရှိဆိုသည့် မေးခွန်းကလည်း အမှုမှန်ပေါ်ပေါက်ရေးအတွက် စိန်ခေါ်ချက်တစ်ရပ် ဖြစ်နေသည်ဟု ၎င်းက ဆက်ပြောသည်။

“တရားရုံးကို စီအိုင်ဒီက သက်သေခံတင်သွင်းထားတဲ့ မှတ်တမ်းမိတ္တူကို တောင်းကြည့်တော့ အပြည့်အစုံမပါတဲ့ CCTV မှတ်တမ်းဖိုင်တွေပဲ ဖြစ်နေတာ တွေ့ရတယ်” ဟု ဗစ်တိုးရီးယား၏ဖခင်က ပြောသည်။

သံသယတရားခံအဖြစ် ဖမ်းဆီးခံထားရသူ ကိုအောင်ကြီး၏ရှေ့နေ ဦးခင်မောင်ဇော်ကိုယ်တိုင်ကပင် ၎င်း၏အမှုသည် လွတ်မြောက်ရေးအပြင် ဗစ်တိုးရီးယားအမှုမှန် ပေါ်ပေါက်ရေးအတွက် CCTV မူရင်းမှတ်တမ်းများက လွန်စွာ အရေးကြီးကြောင်း ဆိုသည်။

ကိုယ်တိုင်လိုက်ပါ ဆောင်ရွက်ခဲ့သည့် ရိုက်တာသတင်းထောက် ကိုဝလုံးတို့၏ ကမ္ဘာကျော်အမှုတွင် စီအိုင်ဒီက အိုင်တီနည်းပညာနဲ့ ပတ်သက်၍ ဖော်ထုတ်ရမည့်ကိစ္စများတွင် အထူးကျွမ်းကျင်ကြောင်း၊ ငါးနှစ်အတွင်း ပျောက်ပျက်သွားသော အချက်အလက်များကို ရှာဖွေနိုင်သည့် စက်လည်းရှိကြောင်း ပြောဆိုခဲ့ဖူးသည်ဖြစ်၍ ယခုကဲ့သို့ အခြေအနေအပေါ် အံ့အားသင့်မိကြောင်း ၎င်းက ဆိုသည်။

“(ကိုဝလုံးတို့အမှု) တုန်းက (ပျက်နေတဲ့အချက်အလက်ကို ပြန်ရှာတဲ့စက်က) ကမ္ဘာမှာ ဘယ်နှစ်လုံးပဲရှိတယ် ဘာညာ စီအိုင်ဒီက ပြောသွားတာဗျ။ ဗစ်တိုးရီးယားအမှုမှာတော့ အဲဒါကြီးကို မသုံးဘူးလား မသိပါဘူးဗျာ” ဟု ဦးခင်မောင်ဇော်က ပြောသည်။

အဆိုပါမေးခွန်းများအတွက် Myanmar Now က ပြည်ထဲရေးဝန်ကြီးဌာန ပြောရေးဆိုခွင့် အဖွဲ့ခေါင်းဆောင် ဦးခိုင်ထွန်းဦးထံ မေးမြန်းရာ မြန်မာနိုင်ငံရဲတပ်ဖွဲ့ထံသို့သာ ဆက်သွယ်ရန် ပြောသည်။ ရဲတပ်ဖွဲ့ ပြောရေးဆိုခွင့်ရှိသူများနှင့် နယ်ခံရဲတပ်ဖွဲ့တို့ထံ မေးမြန်းရာ ဖုန်းပြန်လည်ဖြေဆိုခဲ့ခြင်း မရှိသေးပါ။ စီအိုင်ဒီနှင့်မူ ဆက်သွယ်မေးမြန်းနိုင်ခြင်း မရှိသေးပေ။

ရှာပါ၊ ရှာပါ၊ မြန်မြန်ရှာဖွေပေးပါ

ပျောက်ဆုံးနေသည့် CCTV မှတ်တမ်းများ ပြန်ရရေးအတွက် ဗစ်တိုးရီးယားနှင့် ကိုအောင်ကြီးတို့၏ ရှေ့နေများက ပြီးခဲ့သည့် နိုဝင်ဘာ ၆ရက် တရားခွင်တွင် တရားရုံးသို့ တောင်းဆိုခဲ့သေးသည်။

မူကြိုကျောင်းမှ ကိုရန်နောင်ဌေးဆိုသူ တရားရုံးသို့ လာရောက်တင်ပြထားသည့် CCTV မှတ်တမ်းတင်ထားသည့် DVRစက် (Hard Diskအပါအဝင်) များမှ မူရင်းမှတ်တမ်းများပြန်ရရေး နည်းပညာရှင်များ၏အကူအညီ ရယူဆောင်ရွက်ခွင့်ပြုရန် နှစ်ဖက်ရှေ့နေများက ထိုနေ့ကတရားခွင်တွင် လျှောက်ထားခဲ့ခြင်းဖြစ်သည်။

သို့သော် တရားသူကြီးက အဆိုပါလျှောက်ထားချက်ကို သင့်တော်သည့်အချိန်၌ စစ်ဆေးမည်ဟု ဆုံးဖြတ်ခဲ့သည်။

ဗစ်တိုးရီးယား၏ဖခင်ကတော့ ပျောက်ဆုံးနေသည့် CCTV မှတ်တမ်းများ ပြန်ရှာနိုင်ရေးအတွက် သူ၏ဘက်က ကြိုးစားအားထုတ်မှုတစ်ခု လုပ်ခဲ့သည်။ ယမန်နေ့ (နိုဝင်ဘာ ၁၈)တွင် နေပြည်တော်၊ ဒက္ခိဏခရိုင်ဥပဒေရုံးသို့ သွားရောက်ခဲ့ပြီး ရုပ်သံမှတ်တမ်းဖိုင်များကို အမြန်ဆုံးစစ်ဆေးပေးရန်အတွက် လျှောက်လွှာတင် တောင်းဆိုခဲ့သည်။

ဘာကြောင့် ပျောက်ဆုံးနေသည့် CCTV မှတ်တမ်းများကို အလိုရှိတာလဲဆိုသည့် မေးခွန်းကိုတော့…..

“သက်မဲ့သက်သေတွေက လိမ်လို့မရဘူးလေ” ဟု ဗစ်တိုးရီးယား ၏ဖခင်က ပြန်ဖြေသည်။

Leave a Reply