မြောက်ကိုရီးယား ကွန်မြူနစ်အစိုးရသည် ယင်း၏ အမေရိကန်ပြည်ထောင်စုဆိုင်ရာ အထူးသံတမန် ကင်ဟော့ချူးလ်အပါအဝင် နိုင်ငံခြားရေးဝန်ကြီးဌာနမှ သံတမန်ကြီးများကို သုတ်သင်လိုက်သည်ဟု တောင်ကိုရီးယား သတင်းစာတစ်စောင်ကသောကြာနေ့တွင် ရေးသားဖော်ပြသည်။

အမေရိကန်ဆိုင်ရာ မြောက်ကိုရီးယားအထူးသံတမန် ကင်ဟော့ချူးလ်နှင့် အခြားသံတမန်လေးဦးသည် ဗီယက်နမ်နိုင်ငံတွင်ဖေဖော်ဝါရီလက ကျင်းပပြုလုပ်ခဲ့သော အမေရိကန်-မြောက်ကိုရီးယား ဒုတိယအကြိမ် ထိပ်သီးဆွေးနွေးပွဲတွင် နှစ်နိုင်ငံစေ့စပ်ညှိနှိုင်းရေးအတွက် တာဝန်ယူလုပ်ကိုင်ခဲ့သူများဖြစ်သည်။

ယင်းဒုတိယအကြိမ်ထိပ်သီးဆွေးနွေးပွဲ အောင်မြင်ဖြစ်ထွန်းမှု မရရှိခဲ့သည့်နောက် ပြီးခဲ့သည့် မတ်လအတွင်း ၎င်းတို့ကိုကွန်မြူနစ်အစိုးရက သုတ်သင်လိုက်ခြင်းဖြစ်သည်ဟု တောင်ကိုရီးယားသတင်းစာ Chosun Ilbo က ဖော်ပြသည်။

ထိပ်သီးဆွေးနွေးပွဲမတိုင်မီ ဖြစ်မြောက်ရေးအတွက် အမေရိကန်နိုင်ငံခြားရေးဝန်ကြီး မိုက်ပွန်ပီယိုနှင့်အတူ စေ့စပ်ဆွေးမှုများပြုလုပ်ခဲ့သော အကြီးတန်းအရာရှိ ကင်ယောင်ချူးလ် ဆိုသူမှာလည်း အလုပ်ကြမ်းနှင့်ထောင်ဒဏ် ချမှတ်ပြီး ပညာပေးစခန်းတွင် အပို့ခံထားရသည်ဟု ဆိုသည်။

မြောက်ကိုရီးယားခေါင်းဆောင် ကင်ဂျုံအန်းသည် ပြည်တွင်းရေးပြဿနာများနှင့် မပြေလည်မှုများအပေါ် အာရုံစိုက်မှုများလွှဲပြောင်းသွားစေရေးအတွက် ဧရာမရှင်းလင်း သုတ်သင်မှုများကို ပြုလုပ်နေသည်ဟု ယုံကြည်ရကြောင်း တောင်ကိုရီးယားသတင်းစာက ရေးသားသည်။

“ကင်ဟော့ချူးလ်ကို စစ်ကြောမေးမြန်းတာတွေလုပ်ပြီး မီရင်လေဆိပ်မှာ နိုင်ငံခြားရေးဝန်ကြီးဌာနက အရာရှိလေးဦးနဲ့အတူပြီးခဲ့တဲ့မတ်လက ကွပ်မျက်ပစ်ခဲ့တာ” ဟု အမည်မဖော်လိုသူ မြောက်ကိုရီးယားသတင်းရင်းမြစ်ကို Chosun Ilbo သတင်းစာက ကိုးကားဖော်ပြသည်။

၎င်းတို့ကို အမေရိကန်ပြည်ထောင်စုအတွက် သူလျှိုလုပ်မှုဖြင့် အရေးယူအပြစ်ပေးခဲ့ခြင်းဖြစ်သည်ဟု ဆိုသည်။

Credit: Reuters

Leave a Reply