စစ်ရှောင်စခန်းများလုံခြုံမှု ရခိုင်လူမှုရေး အဖွဲ့စိုးရိမ်

20
၂၀၁၉ ဇန်နဝါရီ လလယ်ပိုင်းက ကျောက်တော်မြို့နယ်၊ ဝါးတောင်စစ်ရှောင်စခန်းတွင် ကျေးရွာ ၇ ခုမှ ဒေသခံ ၁,၀၀၀ ကျော် ခိုလှုံနေသည် (ဓာတ်ပုံ - အောင်ငြိမ်းချမ်း / Myanmar Now)

By ခင်မို့မို့လွင်/Myanmar Now

21/03/2019

ရခိုင်ပြည်နယ်ရှိ စစ်ရှောင်စခန်းများကို တိုက်ပွဲနှင့် ကင်းလွတ်သည့် နေရာသို့ ပြောင်းရွေ့ရန်၊ ကျန်းမာရေးစောင့်ရှောက်မှု၊ ရိက္ခာတို့ ထောက်ပံ့ ကူညီရန် လိုအပ်နေကြောင်း ရခိုင်တိုင်းရင်းသားမျိုးနွယ်များ အစည်းအရုံးမှ အတွင်းရေးမှူး ဦးဇော်ဇော်ထွန်းက ပြောသည်။

ကျောက်တော်မြို့ဝန်းကျင် တိုက်ပွဲများက စစ်ရှောင်စခန်းများအနီးအထိ ရောက်လာနေသည်ဟု ၎င်းက ဆိုသည်။

“ဝါတောင်၊ ကန်စောက်၊ တောင်မင်းကုလား စခန်းတို့မှာ အဲဒီနဲ့ တစ်မိုင်ကွာကွာလေးမှာ တိုက်ပွဲဖြစ်တာ။ စစ်ရှောင်စခန်းကို လက်ခံထားတဲ့ ရွာကလူတွေတောင်မှ တခြားကို ထွက်ပြေးသွားကြတယ်။ သူတို့ လက်ခံထားတဲ့ ရွာကလူတွေတောင် မရှိတဲ့အခါကျတော့ သူတို့လည်းပဲ ဘယ်လိုမှ လုံခြုံသလို မခံစားရတော့ဘူး” ဟု ဦးဇော်ဇော်ထွန်းက ပြောသည်။

စစ်ဘေးရှောင်သူ ၁,၂၂၉ ယောက်ရှိသည့် ဝါးတောင် စစ်ရှောင်စခန်းမှ ကိုမောင်ထွေးက မကြာသေးခင်က ၎င်းတို့ စခန်းနှင့် ငါးမိုင်ခန့် အကွာတွင် တိုက်ပွဲ ရက်အတန်ကြာ ဖြစ်ပွားကြောင်း ပြောသည်။

တိုက်ပွဲကြောင့် ၎င်းတု့ိကို လက်ခံထားသည့် ဝါးတောင်ရွာ အပါအဝင် အနီးရှိ ကျေးရွာများမှ ဒေသခံများ ကျောက်တော်မြို့သို့ ထွက်ပြေးကြကြောင်း ၎င်းက ပြောသည်။

ယခုလအတွင်း မည်သည့် အဖွဲ့အစည်းကမှ ဆန်အိတ်လာရောက် ကူညီခြင်း မရှိသဖြင့် ရိက္ခာ အခက်အခဲ တွေ့နေရကြောင်း ၎င်းက ဆိုသည်။

“ဆန်က တစ်ပတ်စာပဲ ရှိတော့တယ်” ဟု ဦးမောင်ထွေးက ပြောသည်။

Myanmar Now က စစ်ရှောင်စခန်းများတွင် ကြီးကြပ်နေသူများထံ ဆက်သွယ်မေးမြန်းရာ စခန်းများတွင် ဆန်သာမက အမိုးအကာ၊ အိပ်ရာခင်း၊ ဆေးဝါးများလည်း လိုအပ်နေသည်ဟု သိရသည်။

စစ်ရှောင်စခန်းများတွင် ကျန်းမာရေးဆိုင်ရာ ကာကွယ်ရေးအစီအစဉ်များ လိုအပ်သည်ဟု ပုဏ္ဏားကျွန်းမြို့နယ် အခြေစိုက် ပိုးရွှီပြင် မဟာမိတ် လူမှုကယ်ဆယ်ရေးအသင်းမှ ဦးအောင်ကျော်က ဆိုသည်။

“၂၀၁၆ ခုနှစ်တုန်းက အတွေ့အကြုံအရ ဆို နွေလမှာ စစ်ဘေးရှောင်စခန်းတွေမှာ ဝမ်းလျှော ဝမ်းရောင် ရောဂါ ဖြစ်ကြတယ်။ အခုလည်း ဒီစစ်ရှောင်စခန်းတွေမှာ သူတို့က တစ်နယ်တစ်ကျေးကနေ ပြောင်းလာကြတယ်။ သောက်ရေ သုံးရေကလည်း မသန့်ရှင်းတဲ့အခါကျတော့ ဝမ်းလျှော ဝမ်းရောင် ဖြစ်နိုင်တယ်လို့ ကျွန်တော်တို့က သုံးသပ်တယ်။ ကျန်းမာရေး စောင့်ရှောက်တဲ့အဖွဲ့တွေ ဆိုတာလည်း မတွေ့ခဲ့ရဘူး” ဟု ကိုအောင်ကျော်က ပြောသည်။

၂၀၁၈ ခုနစ်မှစ၍ ရခိုင်ပြည်နယ်တွင် ရခိုင်လက်နက်ကိုင်တပ်ဖွဲ့(AA)နှင့် တပ်မတော်ကြား တိုက်ပွဲများ ခပ်စိပ်စိပ် ဖြစ်ပွားလာပြီး စစ်ဘေးရှောင်ပြည်သူများမှာလည်း တစ်နေ့ ထက် တစ်နေ့ တိုးပွားလာနေသည်။

လက်ရှိတွင် ရခိုင်ပြည်၌ စစ်ဘေးရှောင် ဦးရေ ၁၀,၅၅၀ ရှိနေကြောင်း ရခိုင်တိုင်းရင်းသားမျိုးနွယ်များ အစည်းအရုံးမှ အတွင်းရေးမှူး ဦးဇော်ဇော်ထွန်းက ဆိုသည်။

“တချို့က တိုက်ပွဲကြားမှာ ပိတ်မိနေတယ်။ ပိတ်မိနေတဲ့ ရွာက ၂၅ ရွာ ရှိတယ်။ လူဦးရေ ၅,၀၀၀ လောက် ရှိတယ်။ တချို့က ပိတ်မိနေလို့ ထွက်လို့မရဘူး။ တချို့က အိမ်စောင့်ပြီး ကျန်နေခဲ့ရလို့။ တချို့ကျတော့ ပိတ်မိနေတာလည်း မဟုတ်ဘူး။ ထွက်လို့လည်း မရဘူး။ ထိခိုက်မိပြီးတော့မှ ဒုက္ခရောက်နေကြတာ ရှိတယ်” ဟု ဦးဇော်ဇော်ထွန်းက ပြောသည်။

တိုက်ပွဲဖြစ်ပွားသည့်နေရာ များပြားလာသကဲ့သို့ စစ်ပြေးဒုက္ခသည်နှင့် စခန်းအရေအတွက်လည်း များပြားလာသည်။

ယခင်က စစ်ဘေးရှောင်စခန်း ၂၁ ခု ရှိရာမှ ယခုအခါ ၃၀ အထိ ရှိလာကြောင်း ၎င်းက ပြောသည်။

ဒေသတွင်း စစ်မီးတောက်လောက်နေသည့်အချိန်တွင် AA အဖွဲ့က နေပြည်တော်တွင် ပြုလုပ်သည့် ငြိမ်းချမ်းရေးဆွေးနွေးပွဲသို့ ကိုယ်စားလှယ်အဖွဲ့ စေလွှတ်ခဲ့သည်။

အမျိုးသား ပြန်လည်သင့်မြတ်ရေး နှင့် ငြိမ်းချမ်းရေးဗဟိုဌာနက AA အပါအဝင် တိုင်းရင်းသား လက်နက်ကိုင် အဖွဲ့အစည်း ၈ ဖွဲ့ကို ဆွေးနွေးပွဲ တက်ရန် ဖိတ်ကြားထားခြင်း ဖြစ်သည်။

အစိုးရက အင်အား တဖြည်းဖြည်း ကြီးမားလာနေသည့် AA လက်နက်ကိုင် အဖွဲ့ကို ထောက်ခံ အားပေးခြင်း မပြုရန် ဇန်နဝါရီ လဆန်းပိုင်းတွင် တိုက်တွန်းထားသည်။

By ခင်မို့မို့လွင်/Myanmar Now

Advertisements

Leave a Reply