မိုင်းလားတွင် မူးယစ်ဆေးဝါး စိုက်ပျိုး၊ထုတ်လုပ်မှု မရှိတော့ဟု မိုင်းလားအဖွဲ့ဆို

ရှမ်းပြည်နယ်အရှေ့ပိုင်း အထူးဒေသ (၄) မိုင်းလားတွင် မူးယစ်ဆေးဝါး စိုက်ပျိုး၊ထုတ်လုပ်မှု မရှိတော့ကြောင်း မိုင်းလားအဖွဲ့၏ တရားရေးရာကော်မတီ ဌာနကြီးမှူး ဦးကြယ်ဂေါင်က ယနေ့ (ဇွန်လ ၂၆ရက်) မိုင်းလားတွင်ပြုလုပ်သည့် မူးယစ်ဆေးဝါးမီးရှို့ဖျက်ဆီးမှုအခမ်းအနားတွင် ပြောသည်။

အပြည်ပြည်ဆိုင်ရာ မူးယစ်ဆေးဝါးတိုက်ဖျက်ရေးနေ့နှင့်အတူ ရှမ်းပြည်နယ်မြောက်ပိုင်းနှင့် ထိုင်းနိုင်ငံတို့မှ ဝင်ရောက်လာသည့် မူးယစ်ဆေးဝါး ဘိန်းဖြူ၊ ဘိန်းမဲ၊ Ice၊ ခရစ်စတယ်၊ ခါခူး စသည့် မူးယစ်ဆေး ၁၀၀၀ ကီလိုဂရမ်ကို မီးရှို့ဖျက်ဆီးခြင်းဖြစ်သည်။

“ မူးယစ်ဆေးဝါးစိုက်ပျိုးထုတ်လုပ်မှုက လုံးဝမရှိတော့ဘူးလို့ ပြောလို့ရတာပေါ့ အာမခံလို့ရတာပေါ့ ” ဟု ဦးကြယ်ဂေါင်က ပြောသည်။

မူးယစ်ဆေးဝါး ရောင်းဝယ်ဖောက်ကားမှုများနှင့်နိုင်ငံတကာ၏အာရုံစိုက်မှုကို ခံနေရသည့် ရှမ်းပြည်နယ်အရှေ့ပိုင်း ရွှေတြိဂံဒေသနှင့် ကပ်လျက်တွင် မိုင်းလားဒေသ တည်ရှိသည်။

မူးယစ်ဆေးဝါးတိုက်ဖျက်ရေးအတွက် တရုတ်နိုင်ငံ စစ်ဆောင်ပန်းနားပြည်နယ်ခွဲ မူးယစ်ဆေးဝါး တိုက်ဖျက်ရေးဌာနနှင့် ပူးပေါင်းဆောင်ရွက်နေပြီး မိုင်းလားဒေသဥပဒေအရ မူးယစ်ဆေးဝါး ပမာဏအမြောက်အများ ရောင်းဝယ်ဖောက်ကားသူများကိုသေဒဏ်အထိ အရေးယူကြောင်း မိုင်းလားအဖွဲ့ထံမှ သိရသည်။

မိုင်းလားဒေသသည် ရှားပါး တောရိုင်းတိရိစ္ဆာန်များ၏ ခန္စာကိုယ်အစိတ်အပိုင်းများကို ရောင်းဝယ်ဖောက်ကားသည့် ဈေးကွက်တစ်ခုအဖြစ်လည်း နာမည်ကြီးခဲ့သည်။

မိုင်းလားအဖွဲ့ဟု လူသိများသည့် အမျိုးသားဒီမိုကရေစီ သွေးစည်းညီညွတ်ရေးတပ်မတော်(NDAA)သည် ၂၀၁၁ ခုနှစ်တွင်အစိုးရနှင့် ပြည်ထောင်စုအဆင့် အပစ်အခတ်ရပ်စဲရေး လက်မှတ်ရေးထိုးထားသော်လည်း တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ်(NCA) ကို လက်မှတ်ထိုးထားခြင်း မရှိသေးသော လက်နက်ကိုင်အဖွဲ့ဖြစ်သည်။

ထို့အပြင် မူးယစ်ဆေးဝါးတိုက်ဖျက်ရေးအတွက် ပူးပေါင်းဆောင်ရွက်သွားရန် မိုင်းလားအဖွဲ့၏ခေါင်းဆောင် ဦးစိုင်းလင်းနှင့်တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်တို့  ၂၀၁၂ ခုနှစ် အတွင်းက သဘောတူညီချက် ရယူထားကြသည်။

Leave a Reply