ကျန်းမာရေး ဆိုင်ရာဗဟုသုတများ

Covid-19 ရောဂါဟာ တစ်ကမ္ဘာလုံးကို ပျံ့နှံလာတာနဲ့အမျှ အစိုးရနဲ့ ဆရာဝန်တွေက Covid-19 ရဲ့ လက္ခဏာတွေဖြစ်တဲ့ ချောင်းခြောက်ဆိုးတာနဲ့ အဖျား ၁၀၀°F ကျော်တာကို သတိထားဖို့ ထုတ်ပြန်နေကြပါတယ်။

ဒါပေမဲ့ UK တစ်ဝှမ်းက ဆေးရုံတွေဟာ Covid-19 လူနာတွေမှာ လက္ခဏာအသစ်တွေကို တွေ့လာရပါတယ်။ ဗိုက်နာတာကလည်း သူ့ရဲ့လက္ခဏာတစ်ခု ဖြစ်နိုင်လို့ လူတွေကို သတိထားကြဖို့ ပြောဆိုလိုက်ပါတယ်။

ပြည်သူ့ကျန်းမာရေး ဒါရိုက်တာက ဆေးရုံတွေမှာ corona virus ပိုးတွေ့ရှိတဲ့ လူနာတချို့ဟာ တခြားဘာလက္ခဏာမှမပြဘဲ ဗိုက်အောင့်တာတစ်ခုပဲရှိတာကို တွေ့ရတယ်လို့ ဆိုပါတယ်။

တချို့လူနာတွေကတော့ ဗိုက်အရင်အောင့်ပြီး မကြာခင် ဖျားတာ၊ ချောင်းဆိုးတာနဲ့ အသက်ရှူကြပ်တဲ့လက္ခဏာတွေ စလာတာ တွေ့ရှိရပါတယ်။
American အစာအိမ်နဲ့ အူလမ်းကြောင်းဆိုင်ရာ ဂျာနယ်တစ်စောင်မှာတော့ လူနာတွေဟာ အစာအိမ်လမ်းကြောင်းဆိုင်ရာပြဿနာတွေ ခံစားရနိုင်ပြီး ဝမ်းပျက်တာလည်း ခံစားရနိုင်တယ်လို့ ဆိုပါတယ်။

ဟူပေးပြည်နယ်မှာ လူ ၂၀၄ ယောက်ကို လေ့လာချက်အရ ၄၈.၅% သော လူနာတွေဟာ အစာအိမ်ပြဿနာ၊ အစာမကြေတာမျိုးနဲ့ လာတယ်လို့ တွေ့ရပါတယ်။ အန်တာ၊ ဗိုက်အောင့်တာ၊ ဝမ်းလျှောတာမျိုးတွေလည်း ပါတယ်လို့ ဆိုပါတယ်။

ကျွမ်းကျင်သူတွေရဲ့အဆိုအရ အဆုတ်ရဲ့အောက်ခြေမှာ ယောင်လာတဲ့အခါ ကပ်ရပ်ရှိနေတဲ့ ရင်ခေါင်းအမြှေးပါးကိုသွားပြီး ထိခိုက်သလို ဖြစ်တာကြောင့် ဗိုက်နာတဲ့ဝေဒနာကို ခံစားရတာ ဖြစ်ပါတယ်တဲ့။

ရောဂါတွေ့ရှိတဲ့လူတွေ များလာလေ ပုံမှန်သိထားတဲ့ ဖျားတာနဲ့ ချောင်းခြောက်ဆိုးတာတင်မကဘဲ တခြားလက္ခဏာတွေနဲ့ လာတာကို တွေ့ရများလေ ဖြစ်တယ်လို့ ဆိုပါတယ်။

ဗိုက်နာတဲ့လက္ခဏာနဲ့ လာတဲ့လူတွေဟာ အသက်ရှူလမ်းကြောင်းဆိုင်ရာ လက္ခဏာတွေ လုံးဝမပြတာများတယ်လို့ သိရပါတယ်။
အသက်ငယ်တဲ့လူနာတွေက ဝမ်းဗိုက်ပြဿနာနဲ့ လာတာများပြီး အသက်ကြီးတဲ့လူနာတွေမှာတော့ အသက်ရှူလမ်းကြောင်းဆိုင်ရာပြဿနာတွေ တွေ့ရများတယ်လို့ Hirsh က ဆိုပါတယ်။

ဒါကြောင့်မို့ ပျို့အန်၊ ဝမ်းလျှော၊ ဖျားတာတွေနဲ့လာရင် ရိုးရိုးဝမ်းပျက်တာ၊ တုပ်ကွေးဖြစ်တာလို့ ပေါ့ပေါ့လေး မတွေးကြဖို့ လူထုကို သတိပေးထားပါတယ်။
နောက် တခြားတွေ့ရတဲ့လက္ခဏာတွေကတော့ အိပ်ရာကနေ မထနိုင်တာ၊ အနံ့၊ အရသာ မရတော့တာ၊ ခေါင်းကိုက်တာ၊ နှာစေးတာ၊ မျက်လုံးနီတာမျိုးတွေ ဖြစ်ပါတယ်။

Dr. Htar (www.drmyanmar.com)

Credit (www.drmyanmar.com)

Leave a Reply