Friday, December 04, 2020

ရွေးကောက်ပွဲပြန်မလုပ်ပေးရင် ပြည်ခိုင်ဖြိုး အနိုင်ရလွှတ်တော်ကိုယ်စားလှယ်များ တတိယအကြိမ်မြောက် ပြည်ထောင်စုလွှတ်တော်၊ တိုင်းဒေသကြီးလွှတ်တော်၊ ပြည်နယ်လွှတ်တော်တွေက နုတ်ထွက်ပါတော့မယ်ဆိုတဲ့ သတင်းမှားတစ်ခု ထွက်ပေါ်နေပါတယ်။

ဒီသတင်းမှားကို Union Politics ဆိုတဲ့ FB Page တစ်ခုကနေ နိုဝင်ဘာ ၃၀ ရက်နေ့ ည ၁၁ နာရီ ၃၆ မိနစ်မှာ တင်ခဲ့တာပါ။

ပြန်လည်ဖြန့်ဝေသူပေါင်း ၂၆၀ ရှိခဲ့ပြီး ဒီသတင်းမှားကိုပဲ Share နဲ့ ပြန်လည်ဖြန့်ဝေတာမဟုတ်ဘဲ Copy ယူပြီး ပြန်လည်ဖြန့်ဝေသူတွေလည်း ရှိပါတယ်။

ဓာတ်ပုံတွေပါဝင်တဲ့ သတင်းမှားမူရင်းပို့စ်ကို ဒီမှာကြည့်ပါ (https://cutt.ly/Phv0qLp)

ဒီသတင်းကတော့ သတင်းမှားဖြစ်ပါတယ်။ လတ်တလောမှာ ဒီသတင်းနဲ့ပတ်သက်ပြီး သက်ဆိုင်ရာ ပါတီဘက်က တစ်စုံတရာ ထုတ်ပြန်ကြေညာထားခြင်းမရှိပါဘူး။ ဒါ့အပြင် သတင်းမီဒီယာ လုပ်ငန်းစဥ◌်အတိုင်း လုပ်ဆောင်နေကြတဲ့ သတင်းမီဒီယာတွေမှာလည်း ဒီသတင်းကိုဖော်ပြထားတာမျိုး မရှိပါဘူး။

ပြည်ခိုင်ဖြိုးပါတီ ပြောရေးဆိုခွင့်ရှိသူ ဦးသိန်းထွန်းဦးက “ဒါက သတင်းအမှားပါ။ ကျွန်တော်တို့ဘက်ကနေ ဒါနဲ့ပတ်သက်လို့ ဘာမှပြောထားတာ မရှိသလို ဒီသတင်းကလည်း မဟုတ်ပါဘူး ” လို့ ဟင်္သာမီဒီယာရဲ့ သတင်းတု/သတင်းမှား စိစစ်ရေးအဖွဲ့ကို ဒီဇင်ဘာ ၄ နေ့လယ်မှာ ဖြေကြားပါတယ်။

ပြည်ထောင်စုကြံ့ခိုင်ရေးနှင့် ဖွံ့ဖြိုးရေး ပါတီရဲ့ တရားဝင်ပေ့ချ် ကိုဒီမှာကြည့်ပါ ( https://cutt.ly/Fhv0heA )

Union Politics ဆိုတဲ့ ပေ့ချ်မှာတင်ထားတာတွေကို လေ့လာကြည့်မယ်ဆိုရင် တပ်မတော်နဲ့ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီကို အားပေးထောက်ခံတဲ့ ပေ့ချ်ဖြစ်တယ်ဆိုတာကို သိနိုင်ပါတယ်။ ရွေးကောက်ပွဲအပြီးမှာ ခုလို နိုင်ငံရေးနဲ့ ပတ်သက်တဲ့ သတင်းအချက်အလက်မှားတွေဆက်တိုက်ဆိုသလို ထွက်ပေါ်လာနေပါတယ်။

ဒါကြောင့် ဒီသတင်းမှန်/မမှန်ကို စာဖတ်သူများ ကိုယ်တိုင်လည်း သတိပြုမိ စိစစ်စစ်ဆေးနိုင်ဖို့ တင်ပြလိုက်ရပါတယ်။

===

Leave a Reply