Fact Check :

 ရွေးကောက်ပွဲ မဲမသမာမှုတွေကို စုံစမ်းစစ်ဆေးရေးကော်မရှင် စတင်စစ်ဆေးနေပြီဆိုတဲ့ သတင်းတု

လူမှုကွန်ရက်ပေါ်မှာ “၂၀၂၀ ရွေးကောက်ပွဲ အငြင်းပွားမှု၊ မဲမသမာမှုများအား ရွေးကောက်ပွဲစုံစမ်းစစ်ဆေးရေးကော်မရှင်မှ စတင်စစ်ဆေးနေပြီ”ဆိုတဲ့ သတင်းတု တစ်ပုဒ် ပြန့်နှံ့လာတာကို တွေ့ရပါတယ်။

အဲဒီ သတင်းအတုကို နေရီ ဆိုတဲ့ ဖေ့စ်ဘွတ်ခ်အကောင့်က နိုဝင်ဘာ ၁၆ ရက် မွန်းလွဲ ၁ နာရီ ၁၃ မိနစ်မှာ ရေးသားဖော်ပြခဲ့တာဖြစ်ပြီး သတင်းအတုထဲမှာ

“၂၀၂၀ ရွေးကောက်ပွဲ အငြင်းပွားမှု၊ မဲမသမာမှုများအား ရွေးကောက်ပွဲစုံစမ်းစစ်ဆေးရေးကော်မရှင်မှ စတင်စစ်ဆေးနေပါပြီ။ ရွေးကောက်ပွဲစုံစမ်းစစ်ဆေးရေးကော်မရှင်မှ စုံစမ်းစစ်ဆေးမှုများ မပြီးဆုံးမခြင်း မည်သည့်ပါတီမှ အနိုင်အရှုံး မရှိသေးသဖြင့် တရားဝင်ကြေငြာခြင်း မပြုရပါ။ ဆူပူအကြမ်းဖက်မှုများ ဖြစ်ပေါ်လာပါက တရားဥပဒေအရ အရေးယူဆောင်ရွက်သွားပါမည်။ နေပြည်တော် UEC ရုံးနားမှာ ရဲတပ်ဖွဲ့ကတော့ အဆင်သင့် စောင့်ကြပ်နေပါပြီ။  ဥပဒေအား ချိုးဖောက်ပြီး NLD ပါတီက ၂၀၂၀ ရွေးကောက်ပွဲမှာ အနိုင်ရရှိပါတယ်လို့ ကြေငြာလိုက်တာနဲ့

UEC ရုံးနားမှာဘဲ ပွဲက ပြတ်သွားပါလိမ့်မယ်လို့ ထင်တာပဲ”

ဆိုပြီး ဖေ့စ်ဘွတ်ခ် ပိုစ့်မှာ ရေးသားဖြန့်ဝေခဲ့ပါတယ်။ ရေးသားဖော်ပြချက်နဲ့အတူ ဓာတ်ပုံ ၃ ပုံကိုလည်း ပူးတွဲဖော်ပြထားတာကို တွေ့ရပါတယ်။

အဲဒီ သတင်းအမှား ရေးသားချက်ကို ထပ်ဆင့်ဝေမျှသူ ၅၂၀ ကျော်ရှိနေပြီး Like လုပ်ထားသူ ၅၅၀ ကျော် ရှိနေပါတယ်။ ဒီ ဖော်ပြချက်ကိုပဲ တခြားဖေ့စ်ဘွတ်ခ်အကောင့်တချို့မှာ ကူးယူပြီး ပြန်တင်ထားတာတွေ နိုဝင်ဘာ ၁၈ ရက် ညနေပိုင်းထိ တွေ့နေရပါတယ်။

သတင်းဆန်းစစ်ချက်

သတင်းတုမှာ ဖော်ပြထားတဲ့ ‘ရွေးကောက်ပွဲစုံစမ်းစစ်ဆေးရေးကော်မရှင်’ ဆိုတာဟာလည်း မြေပြင်အခြေအနေမှာ တကယ် ဖွဲ့စည်းတည်ထောင်ထားတာမျိုး တပ်ဘက်ကရော အရပ်ဘက်ကပါ တရားဝင် အတည်ပြု ထုတ်ပြန်ကြေညာထားတာ မရှိပါဘူး။

သတင်းအတု ရေးသားချက်မှာ ပူးတွဲ ဖော်ပြထားတဲ့ ဓာတ်ပုံ သုံးပုံထဲက နှစ်ပုံ ကို စစ်ဆေးကြည့်တဲ့အခါမှာ မြန်မာနောင်း သတင်းဌာနရဲ့ အမှတ်အသား သင်္ကေတ ပါနေပြီး ပြည်ထောင်စုရွေးကောက်ပွဲကော်မရှင် နေပြည်တော်ရုံးရှေ့မှာ နိုဝင်ဘာ ၁၁ ရက်က ပြည်ခိုင်ဖြိုးပါတီ တာဝန်ရှိသူအချို့ဦးဆောင်ကာ ဆန္ဒပြမှုကြောင့် ရဲတပ်ဖွဲ့ လုံခြုံရေးရယူနေတဲ့ သတင်းမှာ သုံးထားတဲ့ သတင်းဓာတ်ပုံတွေကို ပြန်လည် ကူးယူအသုံးပြုထားတာ ဖြစ်ကြောင်း တွေ့ရှိရပါတယ်။ သတင်းအမှန်ကိုဒီ လင့်ခ်မှာ ကြည့်ရှုနိုင်ပါတယ်။ ( https://cutt.ly/eg6o2hB ) (https://cutt.ly/dg6o4WR )

အချက်အလက်တွေကို တိုက်ဆိုင်စစ်ဆေးကြည့်တဲ့အခါမှာ ဒီသတင်းအတုဟာ မြန်မာနောင်းရဲ့ သတင်းမှာပါတဲ့ အချက်အလက်တွေကို အသုံးပြုပြီး အချက်အလက်မှားတွေထပ်ထည့်ကာ ထင်ယောင်ထင်မှားဖြစ်အောင် ဖန်တီးရေးသားထားတာဖြစ်ကြောင်း တွေ့ရှိရပါတယ်။

သုံးသပ်ချက်

သတင်းအတုမှန်း သိသာနေတဲ့ ပို့စ် ဖြစ်ပေမဲ့ ရွေးကောက်ပွဲလွန်ကာစ ကာလမှာ အလားတူ ထင်ယောင်ထင်မှား သတင်းတု သတင်းယောင် သတင်းမှားတွေဟာ လူမှုကွန်ရက်စာမျက်နှာထက်မှာ ပုံစံ အမျိုးမျိုး နည်းလမ်းအသွယ်သွယ်နဲ့ တွင်ကျယ်ပျံ့နှံ့နေတာကို သိသာစေရန်အလို့ငှာ ခုလို ဆန်းစစ်တင်ပြလိုက်ရပါတယ်။

စောဆာကဘော်

Leave a Reply