ဝေဖန်နေတဲ့လူတွေကိုလည်းကျွန်တော်စိတ်ထဲမှာမရှိဘူးလို့ပဲမှတ်ယူထားတယ်။

ယခုအပတ်အတွက် ဟင်္သာမီဒီယာရဲ့ အနုပညာကဏ္ဍမှာတော့ မြန်မာဘာသာဖြင့် သီချင်းခွေထုတ်ဝေတော့မည့် မွန်အဆိုတော် စမိုင်းချမ်းနှင့်တွေ့ဆုံပြီးအခွေထုတ်ဖြစ်ပုံနှင့် လတ်တလောလှုပ်ရှားမှု များမေးမြန်းထားသည်များကို ပြန်လည်ဖော်ပြပေးလိုက်ပါသည်။
sa mai chat1

ဟင်္သာ။ ။စမိုင်းချမ်း မြန်မာဘာသာနဲ့ သီချင်းခွေထုတ်ဖို့ စီစဉ်ထားတယ်ဆိုအဲဒါဟုတ်ပါသလား။
စမိုင်းချမ်း။ ။ ဟုတ်ပါတယ်။ အခွေနာမည်က “လာပြီးညာဖြီး”ဖြစ်တယ်။ အခွေထဲမှာဆိုရင် သီချင်း ၁၁ ပုဒ်ပါတယ်။

ဟင်္သာ။ ။ မြန်မာဘာသာနဲ့ ဆိုထားတဲ့ ဒီသီချင်းခွေကပထမဆုံးလား။
စမိုင်းချမ်း။ ။ ဒီအခွေကပထမဆုံးဖြစ်တယ်။ “အဖြူရောင်နှလုံးသား”သီချင်းကဒီအခွေထဲမှာလည်းပါတယ်။ အရင်ကကြော်ငြာချင်လို့ အွန်လိုင်းပေါ်မှာတင်လိုက်တယ်။
မွန်သီချင်းအခွေတစ်ကိုယ်တော် အနေနဲ့ကတော့ ဆယ်ခွေကျော်လောက်ရှိတယ်။ အခြားအဖွဲ့နဲ့ ဆိုထားတာလည်းရှိတယ်။

ဟင်္သာ။ ။ ဘာကြောင့် မြန်မာတိုင်းရင်းသားသီချင်းအခွေကိုထုတ်လဲ။
စမိုင်းချမ်း။ ။ အခုလက်ရှိရန်ကုန်မှာနာမည်ကြီးနေတဲ့ မင်းသားမင်းသမီးတွေ အဆိုတော်တွေ အများစုကတိုင်းရင်းသားတွေများတယ်။ ဒါပေမယ့် ကျွန်တော်တို့ မွန်တိုင်းရင်းသားတွေ အနည်းဆုံးပဲ။ ကျွန်တော်လည်းနာမည်ကြီးတာတော့မဟုတ်ဘူးပေါ့နော်။ ဒါပေမယ့် ဘုရားကနေရာတစ်ခုခုပေးခဲ့မယ်ဆိုရင်တော့ ကျွန်တော်လည်းခံစားခွင့်ရလိမ့်မယ်လို့ ယုံကြည်တယ်။

ဟင်္သာ။ ။ ဘယ်တော့လောက်အခွေ စဖြန့်ဖို့ စီစဉ်ထားလဲ။
စမိုင်းချမ်း။ ။ ကျွန်တော်ရည်မှန်းထားတာက ၉ လပိုင်းလောက်ထွက်ဖြစ်အောင် ရည်ရွယ်ထားတယ် နေ့ရက်အတိအကျတော့ မပြောနိုင်သေးဘူ။ ကြိုးစားနေတုန်းပဲ။ အခုတော့ ဒီအခွေကို MTV ရိုက်နေတယ်။

ဟင်္သာ။ ။ ဒီအခွေကိုဘယ်စတူဒီယိုတွေမှာအသံသွင်းထားလဲ။
စမိုင်းချမ်း။ ။ PTL Studio မှာသွင်းထားတယ်။ Band ကတော့ IC(အိုင်းရင်းခရောစ့်)အဖွဲ့ကတီးခတ်ပေးထားတယ်။

ဟင်္သာ။ ။ Studio မှာအသံသွင်းတာဘယ်လိုကုန်ကျခဲ့လဲ။
စမိုင်းချမ်း။ ။ Studio မှာကတော့ သီချင်းအပုဒ်ရေနဲ့ ပေးရတယ်။ သီချင်းတစ်ပုဒ်ဆိုရင် ၂၂၀ဝ၀ဝ ပေးရတယ်။ IC Band အတွက်ကတော့ သီချင်းတစ်ပုဒ် ၄၀ဝ၀ဝ၀ ပေးရတယ်။ ဒါပေမယ့် IC Band နဲ့ကတော့ ကျွန်တော်မိတ်ဆွေဖြစ်နေတော့ ဈေးလျှော့ပေးထားတယ်။ MTV ကိုကဒီကြားရက်မှာ ရိုက်တော့မယ်၊ သရုပ်ဆောင်ပုံစံကများမယ်၊ ကျွန်တော်အဓိက MTV ကိုပဲဦးစားပေးသွားမယ်။

ဟင်္သာ။ ။ ဒီသီချင်းအခွေထွက်ရင် သီချင်းအခွေမိတ်ဆက်ပွဲတွေ လုပ်ဖို့ရှိလား။
စမိုင်းချမ်း။ ။ နယ်တွေမှာတော့ အစီအစဉ်မရှိသေးဘူး။ ရန်ကုန်မှာကတော့ လုပ်ဖို့တော့ရှိတယ်။ ၉ လပိုင်းအခွေစထွက်မယ်ဆိုတော့ လပိုင်းလောက်ပဲပြောနိုင်တယ်။ နေ့ရက်တော့ အတိအကျမပြောနိုင်သေးဘူ။

ဟင်္သာ။ ။ စမိုင်းချမ်းကဘာကြောင့် မြန်မာဘာသာနဲ့ဆိုတဲ့သီချင်းအတွက် ဒေတာဆိုပြီးနာမည်ပြောင်းလိုက်တယ်။ အဲဒါကရောဘာကြောင့်ပါလဲ။
စမိုင်းချမ်း။ ။ စမိုင်းချမ်းဆိုတဲ့နာမည်ကမွန်အနုပညာလောကအတွက် ရည်ရွယ်ထားတယ်။ ဒေတာဆိုတဲ့ နာမည်ကတော့ မြန်မာတိုင်းရင်းသားအနုပညာလောကအတွက် အသုံးပြုမယ်ဖြစ်တယ်။ နာမည်ကတော့ မရောစေချင်လို့ပါ။

ဟင်္သာ။ ။ မြန်မာတိုင်းရင်းသားအခွေသီချင်းထုတ်တဲ့အတွက် အွန်လိုင်းပေါ်မှာအချို့က ဝေဖန်နေကြတယ်။ အဲဒါတွေကိုရော စမိုင်းချမ်းအနေနဲ့ ဘယ်လိုပြောချင်လဲ။
စမိုင်းချမ်း။ ။ ကျွန်တော်စကြေညာကတည်းကအပြောခံရမယ်ဆိုတာကို ကျွန်တော်သိပြီးသားပါ။ ဒါပေမယ့် ကျွန်တော့်ကိုပြောမယ်ဆိုရင်လည်း ကျွန်တော် အပြောခံပြီးသားပါ။ ကျွန်တော်ရဲ့ရည်ရွယ်ချက်က ကျွန်တော်သွားတဲ့ခရီးကိုရောက်အောင်သွားမယ်။ ဝေဖန်နေတဲ့လူတွေကိုလည်း ကျွန်တော်စိတ်ထဲမှာမရှိဘူးလို့ပဲမှတ်ယူထားတယ်။

ဟင်္သာ။ ။စမိုင်းချမ်းရဲ့အနုပညာလောကမှာ ဖြတ်သန်းခဲ့တဲ့သက်တမ်းကရောဘယ်လောက်ရှိပြီလဲ ။
စမိုင်းချမ်း။ ။ ကျွန်တော်လုပ်နေတဲ့အနုပညာလောကမှာ ၁၅ နှစ်လည်းပြည့်နေပြီး ၁၅ နှစ်လည်းပြည့်နေပြီးဆိုတော့ ကျွန်တော်လည်းဒီအနုပညာလောမှာ ကျွန်တော် တစ်ခုခုကိုပြောင်းလဲစေချင်တယ်။ ကျွန်တော်ရဲ့ အောင်မြင်မှုရရှိခဲ့မယ်ဆိုရင် ကျွန်တော်တို့ လူမျိုးတွေလည်းအကျိုးရှိလိမ့်မယ်လို့ ယုံကြည်တယ်။

ဟင်္သာ။ ။ နောက်ဆုံးအနေနဲ့ ပရိသတ်တွေကိုဘာများပြောချင်သေးလဲ။
စမိုင်းချမ်း။ ။ နိုင်ငံခြားမှာရှိတဲ့ပရိသတ်တွေရော ပြည်တွင်းမှာရှိတဲ့ပရိသတ်တွေရော ကျွန်တော် မြန်မာတိုင်းရင်းသားသီချင်းဆိုတာက ကျွန်တော်သူ့လူမျိုးကိုချစ်လို့မဟုတ်ဘူးလို့ ကျွန်တော်အပေါ်ကိုနားလည်စေချင်တယ်။ ကျွန်တော်တို့ မွန်တိုင်းရင်းသားတစ်မျိုးထဲမဟုတ်ဘူး။ တခြားတိုင်းရင်းသားတွေလည်းအတူတူပဲ မြန်မာစာကိုတော့ တတ်ထားရမှာပဲ။ တချို့တွေကတော့ ပြောတယ်။ မွန်အနုပညာသမားတစ်ယောက် မြန်မာတိုင်းရင်းသားသီချင်းဆိုလို့ နာမည်ကြီးသွားတာကို ဝမ်းနည်းတယ်လို့လည်း ပြောကြတာရှိတယ်။ အချို့တွေကလည်းကိုယ့်ပရိသတ်ထဲကပဲ ကျွန်တော့်ကိုဆဲဆိုတာလည်းရှိခဲ့တယ်။ ကျွန်တော်ပရိသတ်တွေအားလုံး ကျွန်တော့်အပေါ်နားလည်ပေးတဲ့သူတွေကကိုယ့်အနီးအနားမှာရှိတဲ့နားမလည်တဲ့လူတွေကို ဝိုင်းရှင်းပြပေးကြပါ။ နားလည်တဲ့သူတွေအပေါ်မှာအကူအညီတောင်းချင်တယ်။ ပရိသတ်တွေအားလုံးကိုကျေးဇူးတင်ပါတယ်။

Leave a Reply