Myanmar Now

ဂုဏ်သိက္ခာ ကျဆင်းစေရန် ရေးသားနေ၍ဟုဆိုကာ We Love Dauk Zaw Facebook Group အား တာဝန်ခံလုပ်ဆောင်နေသူ နှစ်ဦးကို ဆက်သွယ်ရေးဥပဒေ ပုဒ်မ ၆၆ (ဃ) ဖြင့် မန္တလေးမြို့ အမှတ် ၁၁ ချမ်းမြသာစည် ရဲစခန်းတွင် အမှုဖွင့်လိုက်သည်။

အမျိုးသားဒီမိုကရေစီအဖွဲ့ချုပ် မန္တလေးတိုင်း ပြန်ကြားရေးကော်မတီအဖွဲ့ဝင် ဦးပုညဆွေက မန္တလေးတိုင်း ဝန်ကြီးချုပ် ဒေါက်တာဇော်မြင့်မောင်ကိုယ်စား တရားလိုလုပ်ကာ အမှုဖွင့်လိုက်ခြင်းဖြစ်သည်။

We Love Dauk Zaw Group တွင် ပုံတင်နေကြသူများအနက်မှ Aung Pyae San Win အကောင့်နှင့် Swan Ka Bar အကောင့်ဟူသော အကောင့်နှစ်ခုကို အမှုဖွင့်ထားခြင်းဖြစ်ကြောင်း ဦးပုညဆွေက ဆိုသည်။

“မန္တလေးတိုင်းဝန်ကြီးချုပ်က အမျိုးသားဒီမိုကရေစီအဖွဲ့ချုပ် ဗဟိုအလုပ်အမှုဆောင်အဖွဲ့ ဒုတိယဥက္ကဋ္ဌလည်းဖြစ်တယ်။ ပါတီရဲ့တာဝန်ပေးချက်အရ ဝန်ကြီးချုပ် ဒေါက်တာဇော်မြင့်မောင်ကိုယ်စား တရားလိုအဖြစ် ဂုဏ်သိက္ခာညှိုးနွမ်းစေရန်၊ ပြည်သူလူထု အထင်အမြင်လွှဲမှားစေရန် လွန်လွန်ကျူးကျူး ရေးသားသူအချို့ကို တရားစွဲခြင်းဖြစ်တယ်” ဟု ၎င်းက ဆိုသည်။

ဝန်ကြီးချုပ်၏ ဓာတ်ပုံများပေါ်တွင် “ပါးချခံရမယ်” “ငယ်သေးတဲ့အချစ်မို့ မလေးစားတာလားပြောပါ၊ ကျွန်တော်သိပ်ချစ်တတ်တာ ကျွန်တော်သာ အသိပါ” “ချာတိတ်လေး မင်းကိုယ့်ကို စိုးမိုးလွန်းတယ်ကွယ်” “မင်းဆော်ထက် ငါ့ဆော်ပိုမိုက်တယ် ယျောင့် ငါ့ဆော် ပိုမိုက်တယ်” “စစ်သား-ဒေါက်တာ ဒီနေ့ညက VIP နေ့နော်၊ အေးပါ ငါတို့တွေ အရင်ညထက် ပိုကဲကြတာပေါ့ကွာ” Just for funny စသဖြင့် ရေးသားမှုများကြောင့် တရားစွဲဆိုခြင်းဖြစ်ကြောင်း ၎င်းက ဆိုသည်။

Myanmar Now အနေဖြင့် အဆိုပါ တရားစွဲဆို ခံထားရသူများကို ယနေ့ညနေပိုင်းအထိ ဆက်သွယ် မေးမြန်းနိုင်ခြင်း မရှိသေးပေ။

ဆက်သွယ်ရေးဥပဒေ ပုဒ်မ ၆၆(ဃ)သည် အမြင့်ဆုံး ထောင်ဒဏ် နှစ်နှစ်အထိ ချမှတ်နိုင်သော ပုဒ်မဖြစ်သည်။

Leave a Reply